काठमाडौं, असार १६ । टेलिकम्युनिकेसन ट्राफिक मोनिटरिङ एण्ड फ्रड कन्ट्रोल सिस्टम (टेरामक्स) खरिदमा भ्रष्टाचार गरेको आरोपमा मुद्दा सामना गरिरहेका नेपाली कांग्रेसका सांसद तथा पूर्वमन्त्री मोहनबहादुर बस्नेतलाई विशेष अदालतले २५ लाख रुपैयाँ धरौटीमा रिहा गर्न आदेश दिएको छ।
विशेष अदालतका न्यायाधीश तेजनारायण सिंह राई, रामबहादुर थापा र विदुर कोइरालाको इजलासले सोमबार बस्नेतलाई धरौटीमा छाड्न आदेश दिएको हो। यसअघि अख्तियार दुरुपयोग अनुसन्धान आयोगले गत जेठ १ गते टेरामक्स घोटालामा संलग्न भएको ठहर गर्दै बस्नेतसहित १६ जनाविरुद्ध भ्रष्टाचारको मुद्दा दायर गरेको थियो। बस्नेतमाथि मात्रै ३ अर्ब २१ करोड ८३ लाख ७७ हजार रुपैयाँ बराबरको भ्रष्टाचार आरोप लागेको छ।
मुद्दामा मुछिएका अन्य उच्च पदस्थ अधिकारीहरू:
टेरामक्स प्रकरणमा नेपाल दूरसञ्चार प्राधिकरणका तत्कालीन अध्यक्ष दिगम्बर झा, सदस्यहरू धनराज ज्ञवाली र टीका प्रसाद उप्रेती, अध्यक्ष पुरुषोत्तम खनाल, निर्देशक विजय कुमार राय, र उपनिर्देशकहरू रेवती राय पन्थ, सुरेश बस्नेत, हिरण्य प्रसाद वस्ताकोटी, अच्युतानन्द मिश्र, सुरेन्द्रलाल हाडा, दिपेश आचार्य र सन्दीप अधिकारीसमेत मुछिएका छन्।
अख्तियारले सार्वजनिक निकायमा उच्चपदस्थ व्यक्तिहरूको मिलेमतोमा भएको यो अनियमिततालाई गम्भीर अपराधको रूपमा प्रस्तुत गर्दै कारबाही अघि बढाएको हो।
अब विशेष अदालतमा उनीहरूविरुद्ध विधिसम्मत रूपमा सुनुवाइ प्रक्रिया अगाडि बढ्नेछ। यो प्रकरणले प्रविधि खरिद र कार्यान्वयनमा देखिएको पारदर्शिताको अभाव तथा शक्ति दुरुपयोगको गम्भीर प्रश्न उठाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
