प्रिसा साहको मृत्यु प्रकरणमा निष्पक्ष छानबिन र एनओसी रोक्न सांसदहरूको माग

काठमाडौँ, २१ वैशाख ।  भारतको ओडिसास्थित कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी) मा वीरगञ्जकी विद्यार्थी प्रिसा साह झुन्डिएको अवस्थामा मृत भेटिएको घटनाले राष्ट्रिय सभामा गम्भीर चिन्ता उत्पन्न गराएको छ।

आइतबारको राष्ट्रिय सभा बैठकमा सांसदहरूले घटना प्रति दुःख व्यक्त गर्दै तत्काल निष्पक्ष छानबिन गर्न सरकारसँग माग गरे। बैठक सुरु भएलगत्तै सांसदहरूले सरकारको ध्यानाकर्षण गराउँदै प्रिसाको मृत्यु शंकास्पद रहेको भन्दै आवश्यक कूटनीतिक पहल र अनुसन्धानको माग गरे।

सांसदहरूले सो विश्वविद्यालयमा अध्ययन गर्न जाने नेपाली विद्यार्थीका लागि दिइँदै आएको नो अब्जेक्सन लेटर (एनओसी) रोक्न पनि सरकारलाई आग्रह गरेका छन्।

राष्ट्रिय जनमोर्चाका सांसद तुलप्रसाद विश्वकर्मालगायतले उक्त विश्वविद्यालयमा यसअघि पनि नेपाली विद्यार्थी प्रकृति लम्सालको मृत्युसमेत भएको उल्लेख गर्दै त्यहाँ अध्ययनको अनुमति रोक्नुपर्ने बताएका छन्।

सांसदहरूले नेपाली विद्यार्थीको सुरक्षालाई प्राथमिकता दिनु पर्ने र यस्ता घटनामा कूटनीतिक चासोका साथ सरकार तुरुन्त सक्रिय हुनुपर्नेमा जोड दिएका छन्।