रामबहादुर बम्जनले पाए सफाइ

काठमाडौं , ४ बैशाख ।  उच्च अदालत जनकपुरले रामबहादुर बम्जनलाई बाल यौन दुरुपयोगको आरोपबाट निर्दोष ठहर गरेको छ। जिल्ला अदालत सर्लाहीको फैसला उल्ट्याउँदै उच्च अदालतले बम्जनसहित ज्ञानबहादुर बम्जन र डिगबहादुर बम्जनलाई पनि सफाइ दिएको हो।

न्यायाधीश खेमराज भट्ट र नरिश्वर भण्डारीको संयुक्त इजलासले ‘यथेष्ठ प्रमाणको अभाव’ देखाउँदै फैसला सुनाएको हो। ज्ञानबहादुर र डिगबहादुर जिल्ला अदालतबाट नै सफाइ पाइसकेका थिए भने रामबहादुरलाई १७ असार २०८१ मा १० वर्ष कैद र ५ लाख रुपैयाँ जरिवानाको सजाय सुनाइएको थियो।

सर्लाही अदालतले पीडितको बयान र अनुसन्धानका आधारमा दोषी ठहर गरे पनि बम्जनले उक्त फैसलाविरुद्ध उच्च अदालतमा पुनरावेदन गरेका थिए। पुनरावलोकनपछि उच्च अदालतले अभियुक्तहरूविरुद्ध ठोस प्रमाण फेला नपरेको भन्दै सफाइ दिएको हो।

रामबहादुर बम्जन ‘शान्ति बालक’ वा ‘बुद्धको अवतार’का रूपमा चिनिँदै आएका विवादास्पद व्यक्तित्व हुन्। उनका विरुद्ध यस्तै प्रकृतिका विभिन्न आपराधिक आरोपहरू लाग्दै आएका छन्, जसले धार्मिक र सामाजिक क्षेत्रमा पटक–पटक बहस जन्माएको छ। अदालतको पछिल्लो फैसलाले कानुनी र सामाजिक रूपमा पुनः नयाँ बहस सिर्जना गर्ने संकेत गरेको छ।