कृषि अनियमिततामा सुधार

काठमाडौं । कृषि तथा पशुपन्छी विकासमन्त्री रामनाथ अधिकारीले विगतमा कृषि अनुदानमा अनियमितता भए पनि हाल त्यसको अन्त्य भइसकेको दाबी गरेका छन्। नेपाल उद्योग वाणिज्य महासंघअन्तर्गत कृषि उद्यम केन्द्रले आयोजना गरेको कृषिमा लगानीसम्बन्धी सम्मेलनमा उनले यस्तो बताएका हुन्।

उनका अनुसार मन्त्रालयले हालसम्मको अनुदान विवरण सार्वजनिक गर्ने कार्य सुरु गरिसकेको छ, जसका कारण आगामी दिनमा अनुदान प्रक्रिया पारदर्शी बन्ने र सबै विवरण अवलोकन गर्न सकिनेछ। मन्त्री अधिकारीले विगत पाँच वर्षको अवधिमा कृषि अनुदानका लागि एक खर्ब पाँच अर्ब रुपैयाँ खर्च भइसकेको जानकारी दिँदै यसअघिको जस्तो सिधै मन्त्रालयबाट जाने अनुदान प्रक्रिया अहिले रोकिएको उल्लेख गरेका छन्।

उनले कृषिमा आत्मनिर्भरता हासिल गर्न सबै क्षेत्रको सहकार्य आवश्यक रहेको बताउँदै, राज्यले लिएको कृषि लक्ष्य प्राप्त गर्न निजी क्षेत्रको सक्रिय भूमिका अपरिहार्य रहेको धारणा व्यक्त गरेका छन्।