नगर प्रहरीले १८० जनाका लागि ट्राफिक व्यवस्थापन तालिम

काठमाडौं । काठमाडौं महानगरपालिका नगर प्रहरी बलले नगर प्रहरी हवल्दार र नगर प्रहरी जवान गरी १८० जनाका लागि ट्राफिक व्यवस्थापन तालिम सञ्चालन गरेको छ। आजदेखि राष्ट्रिय सभा गृहमा सुरु भएको उक्त तालिमलाई तीन समूहमा विभाजन गरिएको छ, जसअन्तर्गत प्रत्येक समूहमा ६० जना नगर प्रहरी सहभागी रहेका छन्।

तालिमका आन्तरिक कक्षाहरू सैद्धान्तिक तथा वाह्य अभ्यासमूलक हुने जनाइएको छ। सैद्धान्तिक कक्षामा सवारी तथा यातायात व्यवस्था ऐन, २०४९ तथा नियमावली २०५४ का व्यवस्थासँगै ट्राफिक संकेत, चिन्ह, रोड फर्निचर, सडक सुरक्षा, सुरक्षित यात्रा, ट्राफिक व्यवस्थापनमा सरोकारवालाको भूमिका, विशेष तथा सामान्य अवस्थाको ट्राफिक व्यवस्थापन, सडक दुर्घटना तथा व्यवस्थापन, ट्राफिक व्यवस्थापनमा नवीनतम प्रविधिको प्रयोग, कूटनीतिक सुविधा प्राप्त सवारी साधनसम्बन्धी व्यवस्था, सडक पूर्वाधार तथा सवारी साधन प्रदूषणजस्ता विषयमा प्रशिक्षण प्रदान गरिने उल्लेख गरिएको छ। सैद्धान्तिक रूपमा सिकाइएका विषयवस्तुहरूलाई व्यवहारिक रूपमा प्रयोग गराउने उद्देश्यसहित वाह्य कक्षाहरू सञ्चालन गरिने जनाइएको छ।

तालिम उद्घाटन कार्यक्रममा काठमाडौँ उपत्यका ट्राफिक प्रहरी कार्यालयका प्रमुख, प्रहरी वरिष्ठ उपरीक्षक विनोद घिमिरेले नगर प्रहरीले सहरी व्यवस्थापनको जिम्मेवारीसमेत निर्वाह गर्ने भएकाले ट्राफिक व्यवस्थापनमा यसको भूमिका प्रभावकारी हुने विश्वास व्यक्त गरेका छन्। ट्राफिक व्यवस्थापन केवल कानुन कार्यान्वयनमा सीमित नरही नागरिक आवश्यकताहरू पूर्ति गर्ने सेवा भएकाले नगर प्रहरीबाट यो कार्य थप प्रभावकारी रूपमा सञ्चालन गर्न सकिने उनले उल्लेख गरेका छन्।

त्यस अवसरमा महानगरपालिकाका ट्राफिक विज्ञ सल्लाहकार जगतमान श्रेष्ठले ट्राफिक व्यवस्थापन प्रणालीलाई दक्ष बनाउन नगर प्रहरीले ट्राफिक प्रहरीलाई सहकार्य गर्नुपर्ने आवश्यकता रहेको बताए। उनले सहरी आवागमन सहज बनाउने महानगरपालिकाको जिम्मेवारी प्रभावकारी कार्यान्वयन गर्न यो प्रणाली स्थापना गरिएको जानकारी गराएका छन्।

महानगर प्रहरी बलका प्रमुख, नगर प्रहरी वरिष्ठ उपरीक्षक राजुनाथ पाण्डेले नगर प्रहरीलाई कानुन, नीति तथा आदेशको पालना गर्दै ज्ञान, सीप र विवेकको प्रयोग गर्न सक्ने बनाउन विभिन्न चरणका क्षमता विकास कार्यक्रम सञ्चालन भइरहेको बताए। ट्राफिक व्यवस्थापन तालिम पनि त्यसैको एक भाग भएको उनको भनाइ छ।

नगर प्रहरी उपरीक्षक विष्णुप्रसाद जोशीका अनुसार नगर प्रहरी जवानका लागि १९३ जनालाई दुई चरणमा आधारभूत तालिम प्रदान गरिसकिएको छ। नगर प्रहरीलाई कर्तव्यनिष्ठ, अनुशासित, साहसिक तथा व्यावसायिक बनाउँदै महानगरपालिका र महानगरवासीप्रति समर्पित सेवा प्रदान गर्ने क्षमतायुक्त बनाउन तालिम सञ्चालन गरिएको उनले जानकारी गराएका छन्।

नगर प्रहरीले सहरी व्यवस्थापनका कार्यसँगै प्रमुख, उपप्रमुख र प्रमुख प्रशासकीय अधिकृतको इजलास तथा अदालतबाट भएका निर्णय कार्यान्वयन गर्ने जिम्मेवारी निर्वाह गरिरहेको छ।

नेपालको संविधानले स्थानीय तहलाई दिएको एकल अधिकारअन्तर्गत नगर प्रहरीको व्यवस्था रहेको छ। काठमाडौं महानगरपालिकामा नगर प्रहरी सेवा २०५० साल भदौ १४ गते स्थापना भएको थियो। यसको विकासक्रमअनुसार २०७७ साल चैत २९ गते महानगर प्रहरी बलका रूपमा विस्तार गरिएको हो। २०८० असारमा सम्पन्न नगर सभाको १३औँ अधिवेशनले ‘महानगर प्रहरी ऐन २०८०’ जारी गरेपछि नगर प्रहरी बल थप सशक्त तथा संगठित बनेको उल्लेख गरिएको छ।

महानगर प्रहरी बललाई महानगरपालिकाको चल-अचल सम्पत्तिको सुरक्षा, सभा समारोह तथा चाडपर्व व्यवस्थापन, सहरी व्यवस्थापन, सार्वजनिक सम्पत्तिको सुरक्षा तथा रेखदेख, सरसफाइ तथा सौन्दर्य संरक्षण, विपद् व्यवस्थापन, वातावरणीय सुधारलगायत २८ बुँदामा तोकिएको जिम्मेवारी ऐनमार्फत प्रदान गरिएको छ।