पत्रकारहरूलाई प्रवेश निषेध: ह्वाइट हाउसको कदमप्रति मिडिया संस्थाहरूको आपत्ति

वाशिङ्टन डीसी – अमेरिकाको ह्वाइट हाउसले मिडिया कभरेजसम्बन्धी नयाँ नीति लागू गर्दै केही समाचार संस्थाका पत्रकारहरूको प्रवेशमा प्रतिबन्ध लगाएको छ। ट्रम्प प्रशासनको निर्णयले प्रेस स्वतन्त्रता र लोकतान्त्रिक मूल्यमान्यतामाथि प्रश्न उठाएको छ।

राष्ट्रपति डोनाल्ड ट्रम्पको पहिलो मन्त्रिपरिषद् बैठकमा ह्वाइट हाउसले रोयटर्स, हफपोस्ट, जर्मन पत्रिका डेर ट्यागेस्पिगल र एसोसिएटेड प्रेसका एक फोटोग्राफरलाई प्रवेश अनुमति नदिएको बताइएको छ। यद्यपि, एबीसी, न्यूजम्याक्स, ब्लूमबर्ग न्यूज, एनपीआर, एक्सियोस र द ब्लेजका पत्रकारहरूलाई बैठक कभर गर्न दिइएको थियो।

ट्रम्प प्रशासनका अनुसार, साना स्थानहरूमा राष्ट्रपतिलाई कभर गर्ने पत्रकारहरूको छनोट अब ह्वाइट हाउसले गर्नेछ। परम्परागत रूपमा, यस्तो समन्वय ह्वाइट हाउस संवाददाता संघ (WHCA) ले गर्दै आएको थियो, जसअन्तर्गत राष्ट्रपति कार्यालयको समाचार संकलनका लागि निश्चित पत्रकारहरूलाई पूल प्रणालीमार्फत चयन गरिन्थ्यो।

प्रेस स्वतन्त्रतामाथि प्रश्न उठ्दै
ह्वाइट हाउसको नयाँ नीतिप्रति मिडिया संस्थाहरूले असन्तुष्टि व्यक्त गरेका छन्। एपी, ब्लूमबर्ग र रोयटर्सले संयुक्त विज्ञप्ति जारी गर्दै स्वतन्त्र प्रेसको महत्त्व र राष्ट्रपति कार्यालयको निष्पक्ष समाचार सम्प्रेषणको आवश्यकताबारे जोड दिएका छन्। विज्ञप्तिमा भनिएको छ, “लोकतन्त्रमा जनताले आफ्ना सरकारका गतिविधिबारे स्वतन्त्र, खुला प्रेसबाट सूचना प्राप्त गर्नु अनिवार्य छ।”

हफपोस्टले ह्वाइट हाउसको निर्णयलाई प्रेस स्वतन्त्रताको पहिलो संशोधनको उल्लङ्घन भएको दाबी गरेको छ। यो नीतिले सूचना प्रवाह सीमित गर्ने र प्रेसको स्वतन्त्रतामाथि प्रत्यक्ष हस्तक्षेप गर्ने भन्दै पत्रकार संगठनहरूले आपत्ति जनाएका छन्।

नयाँ नियम लागू भएपछि ह्वाइट हाउस प्रशासनले परम्परागत मिडिया संस्थाहरूलाई दैनिक कभरेजका लागि अझै पनि अनुमति दिने बताएको छ। तर, राष्ट्रपतिसँगको सिधा सम्पर्क हुने साना स्थानहरूमा मिडियाको उपस्थितिलाई नियन्त्रण गर्ने नीति लिइएको ह्वाइट हाउसकी प्रेस सचिव क्यारोलिन लेभिटले स्पष्ट गरेकी छिन्।

प्रेस स्वतन्त्रता र पारदर्शिताको विषयलाई लिएर उठेका यी प्रश्नहरूमा आगामी दिनमा अमेरिकी प्रशासनले कस्तो प्रतिक्रिया जनाउनेछ भन्ने चासो बढ्दै गएको छ।