नेपालकी छात्रा प्रकृति लम्सालको शव आज नेपाल ल्याइने

काठमाडौँ , ७ फागुन । नेपालकी छात्रा प्रकृति लम्साल, भारतको ओडिसास्थित केआईआईटी होस्टेलमा मृत फेला परेकी छिन्। प्रकृतिका बुबा सुनिल, ओडिसास्थित प्रहरी र केआईआईटी प्रशासनसँगको छलफलपछि शव बुधबार नेपाल ल्याउने सहमति भएको छ। सुनिलले पोष्टमार्टम रिपोर्ट आउन बाँकी रहेको बताउँदै छोरीलाई भावनात्मक ब्ल्याकमेल गरेर आत्महत्या गर्न बाध्य पारिएको दाबी गरेका छन्। उनले प्रकृतिको फोन, ल्यापटप र डायरी फरेन्सिक विभागलाई बुझाएको र प्रहरीले अनुसन्धान अघि बढाएको जानकारी दिएका छन्। केआईआईटी प्रशासनले घटनामा दुःख व्यक्त गर्दै माफी मागेको र विद्यार्थीलाई फर्किन आह्वान गरेको छ।

सोमवार, परराष्ट्र मन्त्रालयले घटनाको बारेमा यथार्थ जानकारी प्राप्त गर्न र समस्याको समाधानका लागि कूटनीतिक पहल गर्न आग्रह गरेको जनाएको छ। मन्त्रालयका सहसचिव शिवकुमार सापकोटाले जारी गरेको विज्ञप्तिमा, यस घटनाले विद्यार्थी र अभिभावकको मानसिकतामा पर्ने प्रभाव र भारतका अन्य विश्वविद्यालयमा अध्ययनरत हजारौँ नेपाली विद्यार्थीमा उत्पन्न हुने त्रास र अन्योलतालाई ध्यानमा राख्दै, भारत सरकारसँग सम्पर्क साधिएको उल्लेख छ।

मन्त्रालयले यथाशीघ्र सबै विद्यार्थीहरूको पठनपाठन सामान्य अवस्थामा फर्काउने व्यवस्था मिलाउन आग्रह गरेको छ। यसका साथै, विद्यार्थीहरूको अध्ययनमा अवरोध नगर्ने अवस्था सुनिश्चित गर्न कूटनीतिक तवरबाट परराष्ट्र मन्त्रालयले निरन्तर पहल गरिरहेको जनाएको छ। मन्त्रालयले अन्य विदेशी विश्वविद्यालयहरूमा पनि यस्ता शैक्षिक समस्याहरू समाधान गर्न सहयोग गर्ने उद्देश्यले सहायता कक्ष स्थापना गरेको छ।

अभिभावक र विद्यार्थीलाई संयमित व्यवहार अपनाउन अपिल गर्दै, यदि यस घटनाको न्यायपूर्ण र वैधानिक समाधान नभएमा भविष्यमा उडिसा राज्यका विश्वविद्यालयहरूमा अध्ययनको लागि दिइने वैदेशिक अध्ययन अनुमतिपत्र स्थगित गर्न सकिने चेतावनी पनि मन्त्रालयले दिएको छ।