अमेरिकी संसदमा नेपाली उपस्थिति: ह्यारी भण्डारीसँग विशेष भेटघाट

एजेन्सी । अमेरिकी इतिहासमा पहिलो पटक नेपाली नागरिकले कानुन निर्माण प्रक्रियामा सक्रिय भूमिका निर्वाह गरिरहेका छन्। मेरील्याण्ड राज्यको डिस्ट्रिक्ट ८ बाट निर्वाचित स्टेट डेलिगेट ह्यारी (हरी) भण्डारीले अमेरिकी तल्लो सदनमा कानुन निर्माणमा महत्वपूर्ण योगदान दिँदै आएका छन्। हालै, सांसद गणेश पराजुलीले मेरील्याण्डको राजधानी एन्नापोलिसस्थित भण्डारीको कार्यकक्षमा विशेष भेटघाट गर्ने अवसर प्राप्त गरेका छन्।

भेटघाटका क्रममा सांसद पराजुलीलाई अमेरिकी संसदमा अतिथिका रूपमा स्वागत गरिएको थियो। साथै, संसद अधिवेशन अवलोकन गर्ने अवसरसमेत प्राप्त भएको थियो। सो अवसरमा भण्डारीले अमेरिकी संसदमा कानुन निर्माणको प्रक्रिया सम्बन्धी विस्तृत जानकारी गराएका थिए। नेपालमा संसदमा पेश गरिने कानुनहरू सरकारद्वारा प्रारूप तयार गरी प्रस्तुत गरिन्छन्, भने अमेरिकामा प्रत्येक सांसदले कानुन प्रस्ताव गर्न सक्ने व्यवस्था रहेको जानकारी उनले दिएका थिए। भण्डारीले अहिलेसम्म थुप्रै कानुनहरू प्रस्ताव मात्र नभई पारित गराउन समेत सफल भएको उल्लेख गरेका छन्।

संयुक्त राज्य अमेरिकाको राजनीतिमा नेपाली समुदायको पहिचान स्थापित गर्दै अगाडि बढिरहेका भण्डारीको सफलतालाई सांसद पराजुलीले उच्च मूल्यांकन गरेका छन्। उनले भण्डारीको आगामी यात्रामा अझ सफलता मिलोस् भन्ने शुभकामना व्यक्त गर्दै नेपाली मूलका व्यक्तिहरूले अन्तर्राष्ट्रिय स्तरमा राजनीतिक सफलता प्राप्त गर्न सक्ने प्रमाण भण्डारीले प्रस्तुत गरेको बताए।

ह्यारी भण्डारीको यो उपलब्धिले प्रवासी नेपाली समुदायलाई समेत प्रेरणा प्रदान गरेको छ। अमेरिकी राजनीतिमा नेपालको पहिचान स्थापित गर्न उनी निरन्तर क्रियाशील छन्।