सबै स्वास्थ्य संस्थाहरूलाई विद्युतीय चिकित्सा अभिलेख प्रणालीमा काम गर्न अनिवार्य, विद्युतीय चिकित्सा अभिलेख प्रणाली स्वीकृत

काठमाण्डौ । स्वास्थ्य तथा जनसंख्या मन्त्री माननीय प्रदीप पौडेलले एकीकृत ‘विद्युतीय चिकित्सा अभिलेख प्रणाली सञ्चालन तथा व्यवस्थापन निर्देशिका २०८१’ स्वीकृत गरेको कुरा सार्वजनिक गरिएको छ। यस निर्णयसँगै सबै स्वास्थ्य संस्थाहरूलाई अब विद्युतीय चिकित्सा अभिलेख प्रणालीमा काम गर्नका लागि अनिवार्य गरिएको छ।

मन्त्री पौडेलका अनुसार, यस निर्देशिकाको कार्यान्वयनपछि सरकारी र निजी सबै स्वास्थ्य संस्थाहरूलाई बिरामीको विवरण र तथ्यांकलाई साझा गर्नका लागि एकीकृत प्रणालीमा जानकारी राख्नु पर्ने छ। यससँगै, बिरामीको स्वास्थ्य परीक्षण र उपचारको प्रक्रिया थप व्यवस्थित र पारदर्शी हुनेछ।

यस निर्देशिकाको कार्यान्वयनले स्वास्थ्य सेवामा धेरै सुधार ल्याउने छ। पहिलेका कागजी अभिलेख र दस्तावेजीकरणको परम्परा समाप्त भएपछि, बिरामीका स्वास्थ्य तथ्यांकहरू अब सबै स्वास्थ्य संस्थाहरूबाट डिजिटल रूपमै पहुँच योग्य हुनेछन्। जसले बिरामीको उपचारको क्रममा समय र खर्च बचत हुनेछ।

त्यसैगरी, यस प्रणालीको स्थापना पछि, स्वास्थ्य सेवामा हुने दोहोरोपनाको अन्त्य हुनेछ र नीति निर्माणमा आवश्यक तथ्यांक सहज रूपमा प्राप्त गर्न सकिनेछ।

निर्देशिकाका अनुसार, एकीकृत तथ्यांक व्यवस्थापन प्रणालीले राज्यको स्वास्थ्य नीति र प्राथमिकतासमेत निर्धारण गर्नमा सहयोग पुर्याउनेछ।

स्वास्थ्य मन्त्रालयले यस सुधारको प्रभावकारी कार्यान्वयनका लागि सरोकारवाला क्षेत्रबाट सकारात्मक सहयोगको अपेक्षा गरेको छ।