छ महिनामा मुलुकको व्यापार घाटा उच्च, निर्यातको योगदान सीमित

काठमाडौं । चालु आर्थिक वर्षको पहिलो छ महिनामा मुलुकको कुल व्यापार घाटा रु ७ खर्ब २३ अर्ब ५८ करोड पुगेको नेपाल राष्ट्र बैंकले जनाएको छ। बैंकले सार्वजनिक गरेको विवरणअनुसार, सो अवधिमा वस्तु व्यापार घाटा ४.४ प्रतिशतले वृद्धि भएको छ। अघिल्लो वर्ष सोही अवधिमा व्यापार घाटा २.६ प्रतिशतले घटेको थियो।

राष्ट्र बैंकका अनुसार, समीक्षा अवधिमा निर्यात–आयात अनुपात १२ प्रतिशत पुगेको छ, जुन अघिल्लो वर्षको सोही अवधिमा ९.८ प्रतिशत थियो।

चालु आवको पहिलो छ महिनामा वस्तु निर्यात ३१.८ प्रतिशतले वृद्धि भई रु ९८ अर्ब ७९ करोड पुगेको छ। अघिल्लो वर्षको सोही अवधिमा निर्यात ७.२ प्रतिशतले घटेको थियो।

गन्तव्यका आधारमा भारततर्फको निर्यात ४६.१ प्रतिशत, चीनतर्फको निर्यात १९.७ प्रतिशत तथा अन्य मुलुकतर्फको निर्यात १ प्रतिशतले वृद्धि भएको छ। वस्तुगत रूपमा सोयाबिन तेल, चिया, पोलिस्टर यार्न तथा थे्रड, पार्टिकल बोर्ड र अलैँचीको निर्यात वृद्धि भएको छ भने पाम तेल, जिंक शिट, अदुवा, तयारी पोसाक र जडीबुटीको निर्यात घटेको देखिएको छ।

समीक्षा अवधिमा कूल वस्तु आयात ७.१ प्रतिशतले वृद्धि भई रु ८ खर्ब २२ अर्ब ३७ करोड पुगेको छ। अघिल्लो वर्षको सोही अवधिमा आयात ३.१ प्रतिशतले घटेको थियो।

मूलकगत रूपमा भारतबाट आयात ५.९ प्रतिशत, चीनबाट ८.९ प्रतिशत तथा अन्य मुलुकबाट ९ प्रतिशतले वृद्धि भएको छ। कच्चा भटमास तेल, चामल/धान, यातायात उपकरण, सवारीसाधन तथा त्यसका स्पेयर पार्ट्स, स्पन्ज आइरन र खाने तेलको आयात वृद्धि भएको छ भने पेट्रोलियम पदार्थ, कच्चा पाम तेल, सुन, रासायनिक मल र केराउको आयात घटेको छ।

निर्याततर्फ भैरहवा, विराटनगर, वीरगञ्ज, सुख्खा बन्दरगाह, कैलाली, कृष्णनगर, मेची, नेपालगञ्ज र रसुवा भन्सार कार्यालय बाहेक अन्य प्रमुख नाकाबाट निर्यात घटेको छ।

आयाततर्फ भने सुख्खा बन्दरगाह बाहेक भैरहवा, विराटनगर, वीरगञ्ज, जलेश्वर, कैलाली, कञ्चनपुर, कृष्णनगर, मेची, नेपालगञ्ज, रसुवा, तातोपानी, त्रिभुवन अन्तर्राष्ट्रिय विमानस्थल भन्सार कार्यालयलगायतका सम्पूर्ण प्रमुख नाकाबाट वृद्धि भएको देखिएको छ।

समीक्षा अवधिमा भारतबाट परिवत्र्य विदेशी मुद्रा भुक्तानी गरी रु ८८ अर्ब ५६ करोड बराबरको वस्तु आयात भएको छ, जुन अघिल्लो वर्षको सोही अवधिमा रु ७६ अर्ब २५ करोड थियो।