नेपाल–भारत सैन्य अभ्यास ‘सूर्यकिरण’ को १८औँ संस्करण मंगलबारदेखि सुरु हुने

काठमाडौँ – नेपाल र भारतबीच साझा सुरक्षा उद्देश्य हासिल गर्ने तथा द्विपक्षीय सम्बन्धलाई थप प्रगाढ बनाउने उद्देश्यले आयोजना हुँदै आएको ‘सूर्यकिरण’ सैन्य अभ्यासको १८औँ संस्करण मंगलबारदेखि रुपन्देहीको सालझण्डीमा सुरु हुने भएको छ।

नेपाली सेनाका प्रवक्ता गौरवकुमार केसीले जानकारी दिएअनुसार, यो बटालियनस्तरीय सैन्य अभ्यासले जङ्गल युद्ध, भौगोलिक रूपमा कठिन स्थानमा आतङ्कवादविरुद्धको अभियान सञ्चालन, संयुक्त राष्ट्रसंघीय बडापत्रअनुरूप शान्ति स्थापना, विपद् व्यवस्थापन तथा मानवीय सहायता परिचालनमा केन्द्रित प्रशिक्षण प्रदान गर्नेछ। तालिममा वातावरण संरक्षण, आन्तरिक क्षमता विस्तार तथा चुनौतीपूर्ण परिस्थितिमा सैन्य दक्षता अभिवृद्धि जस्ता विषयमा पनि ध्यान केन्द्रित गरिनेछ।

पुस २९ गतेसम्म चल्ने यस अभ्यासमा नेपाली सेनाको श्रीजङ्ग बटालियन र भारतीय सेनाको ११औँ गोर्खा राइफल्स सहभागी हुने जनाइएको छ। यो अभ्यासले नेपाल र भारतबीचको मित्रता, आपसी विश्वास तथा साझा सांस्कृतिक सम्बन्धलाई थप सुदृढ गर्ने अपेक्षा गरिएको छ। साथै, दुवै देशका सेनाबीच व्यावसायिक सहकार्य र सहयोगलाई बलियो बनाउने विश्वास व्यक्त गरिएको छ।

सैन्य प्रवक्ता केसीका अनुसार, विसं २०६७ बाट वार्षिक रूपमा नेपाल र भारतमा पालैपालो गर्दै आइरहेको यो अभ्यासको पछिल्लो संस्करण भारतको पिथौरागढमा सम्पन्न भएको थियो। हालसम्म नेपाली सेनाका ४,२१५ र भारतीय सेनाका ४,४४२ सैनिकले उक्त अभ्यासमा भाग लिइसकेका छन्।