नेपाल–चीन साझेदारी : २७ लाख मेट्रिक टन प्रशोधित भैंसीको मासु वार्षिक निर्यातको सम्झौता

काठमाण्डौ । नेपाल र चीनका निजी क्षेत्रका साझेदारहरूले वार्षिक १.५ अर्ब अमेरिकी डलर बराबरको प्रशोधित भैंसीको मासु चीन निर्यात गर्ने समझदारीपत्र (एमओयू)मा हस्ताक्षर गरेका छन्। काठमाडौँमा आयोजित एक कार्यक्रममा नेपालको हिमालयन फूड इन्टरनेसनल र चीनको शाङ्गाई जियान फूड कम्पनी लिमिटेडबीच यो सम्झौता भएको हो।

समझदारीअनुसार, पहिलो चरणमा वार्षिक २७ लाख मेट्रिक टन प्रशोधित मासु निर्यात गरिनेछ। साथै, आगामी ६ महिनाभित्र पूर्ण रूपमा स्वचालित पशु वधशाला निर्माण गर्ने योजना पनि सम्झौतामा उल्लेख छ।

यो पहल प्रधानमन्त्री केपी शर्मा ओलीको चीन भ्रमणका क्रममा नेपाल र चीनबीच हस्ताक्षर गरिएको प्रशोधित भैंसीको मासु व्यापारसम्बन्धी प्रोटोकलको परिणामस्वरूप आएको हो। २०११ मा स्थापना भएको हिमालयन फूड इन्टरनेसनल मासु निर्यातमा विशेषज्ञ छ, भने शाङ्गाई जियान फूड कम्पनीले चीनभर ६,००० भन्दा बढी आउटलेटहरू सञ्चालन गर्दै आएको छ।

कम्पनीले नेपालमा २० अर्ब रुपैयाँ लगानी गर्ने र भैंसी पालनका लागि प्राविधिक सहयोग उपलब्ध गराउने इच्छा व्यक्त गरेको छ। पशु वधशाला उद्यमी संघका अध्यक्ष डा. नवीनकुमार शर्माका अनुसार, यस सहकार्यले पशुपालन क्षेत्रमा संलग्न नेपाली युवाहरूलाई ठूलो फाइदा पुर्‍याउनेछ। कृषि तथा पशुपंक्षी विकास मन्त्री रामनाथ अधिकारीले सरकारले चिनियाँ मापदण्डअनुसारको मासु उत्पादन र निर्यात गर्न कटिबद्ध रहेको बताए।

उनले पशु वधशाला तथा मासु निरीक्षण ऐनलाई प्रभावकारी बनाउने र पशुपालन प्रवर्द्धनका लागि आवश्यक नीति ल्याउने घोषणा गरे। भूमि व्यवस्था, सहकारी तथा गरिबी निवारण मन्त्री बलराम अधिकारीले यो सम्झौताले रोजगारी सिर्जना र आर्थिक वृद्धिमा ठूलो योगदान पुर्‍याउने धारणा राखे। चीनका राजदूत छेन सोङले सम्झौताप्रति सन्तुष्टि व्यक्त गर्दै यसले दुई देशबीचको व्यापार सहकार्यलाई सुदृढ बनाउने बताए।