हवाई यात्रीको चाप बढ्यो : सोमबार भए साढे पाँच सय उडान

काठमाडौँ । सङ्घीय राजधानी काठमाडौँ भित्रने र बाहिरिने सडकमार्ग अवरुद्ध भएपछि हवाई यात्रीको चाप उल्लेखनीय रूपमा बढेको छ। असोज ११ र १२ गतेको अविरल वर्षाका कारण मुलुकका विभिन्न स्थानमा बाढीपहिरोले सडक सञ्जाल अवरुद्ध हुँदा काठमाडौँ आउने मुख्य सडकमार्ग अवरुद्ध भएको हो। सडक अवरुद्ध भएपछि पछिल्ला तीन दिनयता हवाईयात्रीको चाप ह्वात्तै बढेको छ।

यसैबीच, मुलुकको अति व्यस्त त्रिभुवन अन्तर्राष्ट्रिय विमानस्थलमा हवाई उडानको नयाँ रेकर्ड कायम भएको छ। विमानस्थलका प्रवक्ता रिञ्जी शेर्पाका अनुसार सोमबार एकैदिन साढे पाँच सय उडान भएको छ। आन्तरिक र अन्तर्राष्ट्रिय गरी कुल ५५९ उडान भएको जानकारी उनले दिएका छन्। आन्तरिकतर्फ हेलिकप्टरसहित २२७ उडान (डिपार्चर) र २२१ अवतरण (अराइभल) भएका छन्।

अन्तर्राष्ट्रिय उडानतर्फ पनि ५६ अवतरण र ५५ उडान भएका छन्। प्रवक्ता शेर्पाले सम्भवतः यो हालसम्मकै सर्वाधिक उडान भएको बताए। यसअघि दसैँको समयमा यति धेरै उडान चाप भएको थियो। विमानस्थलको विवरणअनुसार, त्यस समयमा पनि दैनिक पाँच सय हाराहारी उडान हुने गरेको थियो, जसमा अन्तर्राष्ट्रियमा ११३ देखि १५ उडान र आन्तरिकतर्फ दुई सय ७० उडानमार्फत दैनिक १४ हजार यात्रीले यात्रा गरेका थिए।

आजका लागि आन्तरिकतर्फ १६९ अराइभल र १६९ डिपार्चर उडान तालिका तय गरिएको छ भने अन्तर्राष्ट्रियमा ५८ डिपार्चर र ५७ अराइभल हुने तय भएको छ। हेलिकप्टर उद्धार उडानको सङ्ख्या पनि उल्लेख्य रहेको छ।

वर्षाका कारण अवरुद्ध भएका सडकमार्ग आंशिक रूपमा खुलेपनि यात्रुलाई यात्रा गर्न निकै कठिन भइरहेको छ। यस्तो अवस्थामा हवाई यात्रा नै एकमात्र विकल्प बन्न पुगेको छ। हवाई उडानमा चाप बढेपछि यात्रुहरूलाई गन्तव्यमा पुग्न समस्या भइरहेको छ, जसले गर्दा दिनहुँ विमानस्थलमा यात्रुको भीड लाग्ने गरेको छ। आइतबार र सोमबार आन्तरिक टर्मिनलमा धेरै यात्रुहरू विमान उडानको प्रतीक्षामा थिए।