दोरम्बामा पहिरोको धक्कामा ६ जनाको मृत्यु, ४ जनाको खोजी जारी

रामेछाप । दोरम्बाको शैलुङ गाउँपालिका–३ मा गएराति आएको पहिरोका कारण तीन घर पुरिँदा ६ जनाको मृत्यु भएको छ भने अन्य ४ जना हराइरहेका छन्। एक जनाको अवस्था गम्भीर रहेको छ।

जिल्ला प्रहरी कार्यालयका अनुसार, पहिरोमा परी ३० वर्षीया चण्डीका श्रेष्ठ र उनका १८ महिनाका छोरा आयुष, ५७ वर्षीया उर्मिला पहरी, ३० वर्षका सन्दिप पहरी, ११ वर्षका सन्तोष पहरी र १४ वर्षका विज्ञान पहरीको मृत्यु भएको हो। ११ वर्षीया अञ्जना श्रेष्ठ घाइते भएकी छन्, जसको कम्मरभन्दा मुनिको भाग चलेको छैन।

गाउँपालिकाकी उपाध्यक्ष खमला थापामगरका अनुसार, गएराति पहिरो खसेको हो। घटनाबारे जानकारी पाउनासाथ स्थानीयवासी, प्रहरी र नेपाली सेनाका जवान उद्धार र खोजीमा जुटेका छन्। जिल्ला प्रहरी कार्यालय रामेछापका प्रहरी नायब उपरीक्षक प्रदीपकुमार सिंहले पहिरोले वडा नं २ र ३ को सिमाना भएर बग्ने अँधेरी खोलको पक्की पुल पनि बगाएको जानकारी दिएका छन्।

प्रहरी र बचाव दल घटनास्थलमा पुगेका छन् र हराइरहेका व्यक्तिहरूको खोजी जारी राखेका छन्।