सिमलताल दुर्घटना : वेपत्ता बस र यात्रीको खोजीमा खटियो भारतीय टोली

काठमाडौँ , ६ साउन  |  गत असार २८ गते नारागणगढ–मुग्लिन सडकखण्डको सिमलतालमा गएको पहिरोले त्रिशूलीमा बगाएर बेपत्ता भएका दुईवटा बस र तिनमा सवार यात्रीलाई भारतीय टोलीले खोजी गर्दैछ ।

आज बिहान देखि अत्याधुनिक सोनार क्यामरा लगायतका उपकरणसहित आएको १२ सदस्यीय भारतीय टोलीले खोजी सुरु गरेको हो । त्रिशूलीको बहाव बढेका कारण बेपत्ता बस र यात्रुको खोजीकार्य प्रभावित भएको छ।

चितवनको सिमलतालमा काठमाडौं आउँदै गरेको बागमती प्रदेश–०३–००६ ख १५१६ नम्बरको एन्जल डिलक्स र काठमाडौंबाट रौतहटको गौरका लागि छुटेको बागमती प्रदेश–०३–००१ ख २४९५ नम्बरको गणपति डिलक्स बस लेदोसहितको पहिरोमा परि बेपत्ता भएको थियो।

बसमा ६५ जना यात्रु सवार थिए जसमा ३ जनाले ज्यान जोगाए भने अन्य ६२ जना बेपत्ता छन्। भारतको पश्चिम चम्पारण बगाहामा दुई वटा शव फेला परेको छ ।