बिराटचोकमा लेखाशास्त्र शिक्षकहरूको लागि एक दिने तालिम सम्पन्न

बिराटचोक, मोरङ – असार ११ गते शनिबार, एसीसीए (ACCA) नेपाल र NCA College of Management को संयुक्त आयोजनामा मोरङ जिल्लाको बिराटचोक स्थित होटल नेपालीरिकामा एक दिने तालिम सम्पन्न भएको छ। कोशी प्रदेशका मोरङ, सुनसरी, र झापा जिल्लाका ११ र १२ कक्षामा तथा बीबीए र बीबीएसमा लेखाशास्त्र (Accountancy) विषय अध्यापन गराउने ७० वटा कलेजका ८० शिक्षक/शिक्षिकाहरूलाई हाल परिबर्तित पाठ्यक्रममा समावेश गरिएको नयाँ पाठ्य सामग्री (NAS & NFRS) सहित Certificate in International Financial Reporting Standard सम्बन्धी तालिम दिइएको हो।

तालिमको समुद्घाटन सत्रको अध्यक्षता एनसीए कलेजका अध्यक्ष श्री सुरेश पण्डितले गर्नुभयो भने आयोजक एसीसीए नेपाल प्रमुख श्री रबिन कट्वालले कार्यक्रमको उद्देश्य र महत्व माथि प्रकाश पार्नुभयो। साथै, अतिथि महानुभावहरूलाई मायाको चिनो प्रदान गरियो।

उद्घाटन सत्रमा पूर्वाञ्चल विश्वविद्यालयका उपकुलपति प्रा. डा. विजुकुमार थपलियाले पानसमा बत्ती बालेर कार्यक्रमको उद्घाटन गर्दै कार्यक्रमलाई सम्बोधन गर्नुभयो। साथै, मदन भण्डारी स्मृति प्रतिष्ठानका कार्यकारी निर्देशक प्रा. विनोद अर्याल, सुन्दरहरैचा नगरपालिकाका प्रमुख केदार प्रसाद गुरागाई, हिसानका केन्द्रिय उपाध्यक्ष भेषराज पोखरेल, राष्ट्रिय परीक्षा बोर्ड विराटनगरका प्रमुख जीवन गड्तौला, एनप्याव्सन कोशी प्रदेशका सभापति राजन पौडेल र नेपाल राष्ट्रिय शिक्षक संगठन झापाका अध्यक्ष द्रोण बहादुर श्रेष्ठले कार्यक्रमको सफलताको शुभकामना व्यक्त गर्नुभयो। कार्यक्रममा मोरङ, सुनसरी, र झापा जिल्लाका हिसान, प्याब्सन, एनप्याब्सन र विभिन्न शिक्षक संगठनका अध्यक्षहरूको उपस्थिति थियो।

कार्यक्रमलाई सम्बोधन गर्दै प्रमुख अतिथि प्रा. डा. बिजुकुमार थपलियाले नेपालको सन्दर्भमा International Financial Reporting Standard (IFRS) को महत्व बताउँदै शिक्षाका बारेमा नयाँ बहस आवश्यक रहेकोमा जोड दिनुभयो। प्रा. विनोद अर्यालले एसीसीएको विश्वव्यापी लोकप्रियता बारेमा चर्चा गर्दै यसका बारेमा शिक्षा क्षेत्रमा कार्यरत सबैले जानकारी लिनुपर्ने सुझाव दिनुभयो। राष्ट्रिय परीक्षा बोर्ड विराटनगरका प्रमुख श्री जीवन गड्तौलाले हालसालै कक्षा ११ र १२ को पाठ्यक्रम परिवर्तन गरेको सन्दर्भमा यो तालिम अत्यन्तै सान्दर्भिक र उपयोगी रहेको बताउनुभयो।

एनसीए कलेजले विगत २० वर्षदेखि नेपाली विद्यार्थीलाई गुणस्तरिय एसीसीए (ACCA) व्यवसायिक शिक्षा प्रदान गर्दै आएको छ। सन् २०१० मा कलेजले अध्ययन/अध्यापनको गुणस्तर मापन गरी The Association of Chartered Certified Accountants (ACCA) बाट Approved Learning Partner/Gold को मान्यता प्राप्त गरेको छ। शिक्षा मन्त्रालयबाट एसीसीए तयारी कक्षा सञ्चालन गर्न स्वीकृत प्राप्त गर्ने यो नेपालको पहिलो कलेज हो।

एक दिने तालिममा कर्ण थापाले प्रशिक्षण दिनुभयो भने एसीसीए कोर्स र एनसीए कलेजका बारेमा अध्यक्ष सुरेश पण्डितले जानकारी दिनुभयो। कार्यक्रमको अन्त्यमा राष्ट्रिय परीक्षा बोर्ड विराटनगरका प्रमुख जीवन गड्तौलाले सहभागीहरूलाई प्रमाणपत्र वितरण गर्नुभयो। कार्यक्रमको संयोजन र सञ्चालन शिक्षाविद् नारायण आचार्यले गर्नुभएको थियो।