मन्त्रीज्यूको गाडी बालकुमारीबाट चल्नुले नै यस्तो दुःखद घटना हुन पुग्यो:महानिरीक्षक कुँवर

काठमाडौँ, १६ पौष ।  प्रहरी महानिरीक्षक वसन्त बहादुर कुँवरले बालकुमारीमा मन्त्री सवार नभएको भए दुःखद् घटना नघट्ने बताएका छन्।

आज बिहान बसेको संसदको राज्य व्यवस्था तथा सुशासन समितिको बैठकमा जवाफ दिने क्रममा प्रहरी महानिरीक्षक कुँवरले  बालकुमारीमा भएको घटनाबारे जानकारी दिँदै उनले मन्त्री त्यहाँ जाँदा स्थिति असामान्य बन्न पुगेको बताए। कुँवरले भने  मन्त्रीज्यूको गाडी त्यही सडकबाट नआएको भए यस्तो हुने थिएन ।

महानिरीक्षक कुँवरले भने, ‘मन्त्रीज्यू हिँड्दाखेरि पीएसओले जानकारी लिएर रुट क्लियर छ कि छैन भन्ने कुराको समन्वय भएन। भिडमा आएर गाडी रोकिएपछि मन्त्रीसँग सामान्य विवाद भयो।’

प्रदर्शनकारी माथि १२४ सेल अश्रुग्यास, रबर बुलेट र हवाइ फायर गरिएको उनले बताए। प्रहरी र पीएसओबीच सञ्चार समन्वय नभएकाले घटना भएको र धैर्यता गुमाएको अवस्था देखिएको कुँवरले बताए।

गत शुक्रबार बालकुमारीमा प्रदर्शनका क्रममा सुरक्षाकर्मीको गोली लागेर २ जना युवाको मृत्यु भएको थियो।