कांग्रेसले पठायो महामन्त्रीद्वय थापा र शर्मालाई भूकम्प प्रभावित क्षेत्रमा

काठमाडौं, २२ कार्तिक । नेपाली कांग्रेसका महामन्त्रीद्वय गगन थापा र विश्वप्रकाश शर्मा बुधबार भूकम्प प्रभावित क्षेत्रमा पुग्ने भएका छन् । कांग्रेस पार्टी कार्यालयका अनुसार महामन्त्रीद्वयले त्यहाँ रहेर ‘७ बुँदे कार्य’ मा ध्यान केन्द्रित गर्नेछन् । उनीहरू पार्टीको ‘केन्द्रीय अनुगमन तथा व्यवस्थापन सहजीकरण समिति’ का तर्फबाट त्यहाँ गएका हुन् ।

जसअनुसार उनीहरुले उद्धार कार्य तदारुक र प्रशंसनीय ढङ्गले भए पनि राहत सामग्री अझै पनि कयौँ पीडितमा नपुगेको भनेर सञ्चार माध्यम मार्फत उजागर भएको अवस्थामा कमजोरीहरूको वास्तविकता पहिचान गरि अविलम्ब उचित व्यवस्थापनमा ध्यान, ध्यानाकर्षण र सहजीकरण गर्नेछन् ।

यस्तै उद्धार र राहतमा पुगेका बाह्य संघ–संस्था र व्यक्तिहरूबाट कतै प्रतिकुल असर परेको अवस्था त छैन भन्नेबारेमा निरीक्षण गरेर अविलम्ब त्यस्तो स्थितिलाई व्यवस्थापन गर्न–गराउन सुझाव र सहजीकरण महामन्त्रीद्वयले गर्नेछन् ।

उद्धार र राहत क्रममा नेपाली कांग्रेस पार्टीको भूमिका, उद्धार र राहतको अवस्था, सुत्केरी, अपाङ्गता भएका नागरिक, बालबालिका एवं वृद्ध वृद्धालाई विशेष प्राथमिकता साथ तत्कालीन व्यवस्थापनमा रहेका कमजोरी पहिचानलगायतका बारेमा पनि उनीहरुले आवश्यक अध्ययन गर्नेछन् ।

यसैगरी पुनर्स्थापना र पुनर्निर्माणका लागि नेपाली कांग्रेसको धारणा प्रधानमन्त्रीलाई लिखित रूपमा बुझाइएको भन्दै कांग्रेसले यसको कार्यान्वयनमा के कस्तो समस्याहरु आईपर्ने भन्नेबारेमा पनि आवश्यक परामर्श र अध्ययन गर्नेछन् ।

गत शुक्रबार मध्यराति जाजरकोटको रामीडाँडा केन्द्रबिन्दु भएर गएको ६.४ म्याग्निच्युडको भूकम्पले जाजरकोट, रुकुम पश्चिम लगायतका जिल्लामा ठुलो जनधनको क्षति भएको छ ।