नेपाली सेनाद्वारा ज्येष्ठ नागरिकलाई बडादसैँको अवसरमा भोजन

काठमाडौँ, ८ कार्तिक ।बडाको दसैँको अवसरमा नेपाली सेनाले आश्रमका ज्येष्ठ नागरिकलाई भोजन गराएको छ । मङ्गलबार बाँके राष्ट्रिय निकुञ्जको सुरक्षामा तैनाथ शमशेरगञ्जस्थित ओभरीमा रहेको अर्जुनवाण गणले कोहलपुर नगरपालिका वडा नं ५ स्थित एनसीसीको नीलसागर आश्रममा रहेका ज्येष्ठ नागरिकहरूलाई भोजन गराएको हो ।

कार्यक्रममा राझाँस्थित चारवाहिनी अड्डाका वाहिनीपति एवं सहायक रथी प्रकाश थापाले नि:स्वार्थ भावमा मानव सेवामा समर्पित उक्त आश्रमलाई नेपाली सेनाको साथ र सहयोग रहने प्रतिबद्धता व्यक्त गरे ।

चाडबाडको अवसरमा आश्रममा आश्रित ज्येष्ठ नागरिकलाई एक्लोपन महसुस नहोस् भन्ने उद्देश्यले खानाको व्यवस्था गरिएको गणपति अशोक खड्काले बताए ।

‘चाडपर्व भनेको आफन्तसँग मनाउने पर्व हो तर आश्रममा आफन्त नभएकाहरूलाई आफन्तको कमी महसुस नहोस् भन्ने उद्देश्यले हामीले बडासैँका दिन भोजन गराएर आफ्नोपनको अनुभूति गराएका मात्र हौँ,’ उनले भने ।

कोहलपुर नगरपालिकाका उपप्रमुख सङ्गीता सुवेदीले आश्रम सञ्चालन गर्नु राज्यको दायित्व भए पनि यो काम नीलसागर आश्रमले निःस्वार्थ भावले गरेकाले उक्त संस्थालाई नगरपालिकाले पनि सहयोग गर्ने बताए ।

उनले फजुल खर्च गरेर मनाइने जन्मदिन र वैवाहिक वर्षगाँठबाट केही रकम छुट्याएर उक्त आश्रमलाई सहयोग गर्न नगरवासीलाई आग्रह गरे ।

बाँकेमा केन्द्रीय कार्यालयको रूपमा स्थापना भएको नीलसागर आश्रमका शाखाहरू काठमाडौं, पोखरा, पाल्पा, सुर्खेत, बर्दिया, दैलेख, कोहलपुर र दाङ्ग गरेर आठ जिल्लामा सञ्चालित छन् ।

कोहलपुर शाखामा रहेका २८ जना ज्येष्ठ नगरिकलाई नेपाली सेनाले बडा दसैँको दिन भोजन खुवाउनुका साथै राप्तीसोनारी गाउँपालिका ५ स्थित बिनौनामा रहेको जयबागेश्वरी आश्रमका १२ बालबालिकालाई पनि भोजन गराएको थियो । रासस