प्रधानमन्त्रीको चीन भ्रमणको तालिका सार्वजनिक

काठमाडौँ, ४ असोज । प्रधानमन्त्री पुष्पकमल दाहालको चीन भ्रमणको औपचारिक घोषणा भएको छ । परराष्ट्र मन्त्रालयले बिहीबार एक विज्ञप्ति जारी गर्दै प्रधानमन्त्री दाहालको चीन भ्रमणको तालिका सार्वजनिक गरेको हो ।

यही सेप्टेम्बर २३ देखि ३० (असोज ६ देखि १३ गते) सम्म एक साता प्रधानमन्त्री दाहालले चीन भ्रमण गर्नेछन् ।  भ्रमणका क्रममा प्रधानमन्त्री दाहालले चिनियाँ राष्ट्रपति सी जिनपिङ र प्रधानमन्त्री लीसँग छुट्टाछुट्टै भेटवार्ता गर्ने कार्यक्रम तय भएको परराष्ट्रले जनाएको छ । दाहालले राष्ट्रपति सीसँग हाङझाउमा भेट गर्नेछन् ।

यसैगरी सेप्टेम्बर २३ मा हाङजाओमै हुने १९ औँ एसियाली खेलकुदको उद्घाटन समारोहमा प्रधानमन्त्री दाहाल सहभागी हुनेछन् । यसक्रममा प्रधानमन्त्रीले चीनको तिब्बत स्वायत्त क्षेत्र ल्हासाको पनि भ्रमण गर्ने कार्यक्रम रहेको छ ।

हाल संयुक्त राष्ट्रसंघको महासभामा सहभागी हुन अमेरिका भ्रमणमा रहेका प्रधानमन्त्री दाहाल न्युयोर्कबाटै चीन जाने छन् । चीन भ्रमण सकेर असोज १३ गते प्रधानमन्त्री दाहाल काठमाडौं आइपुग्ने परराष्ट्रले जानकारी दिएको छ ।

चीनका समकक्षी ली छियाङको निमन्त्रणामा हुन लागेको भ्रमणमा  प्रधानमन्त्रीको साथमा उनकी छोरी गंगा दाहाल, परराष्ट्रमन्त्री नारायण प्रकाश साउद, खानेपानी मन्त्री महिन्द्रराय यादव, भौतिक पूर्वाधार तथा यातायात मन्त्री प्रकाश ज्वाला, राष्ट्रिय सुरक्षा सल्लाहकार शंकरदास बैरागी, राष्ट्रिय योजना आयोगका उपाध्यक्ष मीनबहादुर श्रेष्ठ, अन्य वरिष्ठ सरकारी अधिकारीहरुका साथै व्यापारिक समुदायका प्रतिनिधिहरुको सहभागिता रहने मन्त्रालयले जनाएको छ।