हृदयघातका कारण करिश्मा कपूरका पूर्वपति संजय कपूरको निधन

एजेन्सी । बलिउड अभिनेत्री करिश्मा कपूरका पूर्वपति तथा भारतीय उद्योगपति संजय कपूरको १२ जुन २०२५ मा बेलायतको इङ्गल्याण्डमा हृदयघातका कारण निधन भएको छ। उनी ५३ वर्षका थिए।

संजय कपूर सोना कमस्टार कम्पनीका अध्यक्ष तथा गैर-कार्यकारी निर्देशक थिए। कम्पनीले एक विज्ञप्ति जारी गर्दै भनिएको छ, “हामी गहिरो दुःखका साथ सोना कमस्टार का अध्यक्ष तथा गैर-कार्यकारी निर्देशक श्री संजय जे. कपूरको असामयिक निधनको घोषणा गर्दछौं। १२ जुन २०२५ मा बेलायतमा अचानक हृदयघातका कारण उहाँको निधन भएको हो।”

विज्ञप्तिमा संजय कपूरलाई एक दूरदर्शी नेता भन्दै श्रद्धाञ्जली दिइएको छ। “उहाँले सोना कमस्टारलाई नवप्रवर्तन, दिगोपन र उद्देश्यमा आधारित एक विश्वव्यापी गतिशीलता प्रविधि कम्पनीको रूपमा विकास गर्न महत्वपूर्ण योगदान दिनुभयो,” विज्ञप्तिमा उल्लेख छ।

संजय कपूरको निधनको खबर सार्वजनिक भएलगत्तै उनकी पूर्वपत्नी करिश्मा कपूरको घरमा उनका आफन्त तथा बलिउड कलाकारहरू पुग्न थालेका छन्। बहिनी करीना कपूर, उनका पति सैफ अली खान, मलाइका अरोरा र अमृता अरोरा करिश्मालाई सान्त्वना दिन घरमै पुगेका थिए।