स्याङ्जामा नवग्रह मन्दिर उद्घाटन: धार्मिक पर्यटन प्रवर्द्धनको अपेक्षा

स्याङ्जा — स्याङ्जाको अर्जुनचौपारी गाउँपालिका वडा नम्बर १ मा नेपालकै पहिलो नवग्रह मन्दिरको निर्माण कार्य सम्पन्न भएको छ। मन्दिरको प्राण प्रतिष्ठा तथा अनुष्ठान महाशिवरात्रिको अवसर पारेर सम्पन्न गरिएको हो। फागुन ६ गतेदेखि नौ दिनसम्म सञ्चालन भएको धार्मिक महोत्सव १४४ वर्षमा एक पटक आउने महाकुम्भ मेलाको समयमा आयोजना गरिएको थियो।

अर्जुनचौपारीमा सम्पन्न यो धार्मिक महोत्सव परम्परागत धार्मिक अनुष्ठानहरू भन्दा केही भिन्न रहेको जनाइएको छ। अन्य धार्मिक महोत्सवहरू आर्थिक संकलनमा केन्द्रित रहने प्रवृत्तिलाई तोड्दै, नवग्रह मन्दिरमा धार्मिक अनुशासन र समान व्यवहारलाई प्राथमिकता दिइएको पालिका अध्यक्ष विष्णु प्रसाद तिवारीले बताए। उनका अनुसार, महोत्सवमा सहभागी भक्तजनहरूमाथि कुनै पनि भेदभाव नगरिएको र धार्मिक कार्यक्रमलाई विकृति मुक्त बनाउन विशेष ध्यान दिइएको थियो।

महोत्सव अवधिभर सहयोगीहरूको नाम उल्लेख गर्दै शिलालेख राख्ने परम्परा तोडिएको र सबै वडाका अध्यक्षहरूलाई सभापतिको जिम्मेवारी प्रदान गरिएको थियो। नौ दिनसम्म सञ्चालन भएको महोत्सवमा नेपाल तथा छिमेकी मुलुकहरूबाट करिब १ लाख २५ हजार भन्दा बढी भक्तजनले दर्शन गरेको नवग्रह मन्दिर व्यवस्थापन समितिका अध्यक्ष भरतराज पोखरेलले जानकारी दिए। साथै, करिब १ लाखभन्दा बढी भक्तजनका लागि निःशुल्क भोजनको व्यवस्था गरिएको थियो।

धार्मिक महोत्सव अन्तर्गत सवा करोड दीप प्रज्वलन, चार वेदको पाठ पारायण, गायत्री मन्त्रद्वारा सवालाख हवन, धार्मिक अन्तरक्रिया, सन्ध्याकालीन महाआरती तथा भजन कीर्तनका कार्यक्रमहरू सञ्चालन गरिएको थियो। अनुष्ठानमा प्रमुख वाचकका रूपमा आचार्य श्री चैतन्य कृष्ण महाराज रहेका थिए भने डा. केएन स्वामीले पनि धार्मिक प्रवचन दिएका थिए।

महोत्सवको उद्घाटन नेपाल सरकारका संस्कृति, पर्यटन तथा नागरिक उड्डयनमन्त्री बद्री प्रसाद पाण्डेले गरेका थिए भने समापन नेपाली कांग्रेस स्याङ्जाका सभापति एवं प्रतिनिधि सभा सदस्य राजु थापाले गरेका थिए। महोत्सव अवधिभर राष्ट्रिय तथा स्थानीय कलाकारहरू, क्रिक्रेटर सन्दीप लामिछाने, सरकारी निकायका प्रमुख अधिकारीहरू तथा स्थानीय तहका प्रमुख र उपप्रमुखहरूको उल्लेखनीय सहभागिता रहेको थियो।

नवग्रह मन्दिर निर्माणको अवधारणा विभिन्न सिद्धिप्राप्त योगीहरूको सल्लाह अनुसार तय गरिएको बताइएको छ। विभिन्न शक्तिपीठहरूमा नवग्रहको प्रतिमा राखेर पूजाआजा गरिने प्रचलन रहेपनि, योगीहरूको सुझाव अनुसार अर्जुनचौपारीलाई नै नवग्रह मन्दिर स्थापनाका लागि उपयुक्त स्थानका रूपमा चयन गरिएको हो।

स्याङ्जाको अर्जुनचौपारी गाउँपालिका पर्यटकीय दृष्टिले पनि महत्वपूर्ण रहेको र पोखराबाट केही घण्टामै पुग्न सकिने भएकाले नवग्रह मन्दिरले स्वदेशी तथा विदेशी पर्यटक आकर्षित गर्ने स्थानीय प्रशासनको विश्वास छ। मन्दिर हरेक शनिवार मात्र खुला रहनेछ भने नौ चक्रमध्ये एक चक्र भक्तजनहरूको सुविधालाई मध्यनजर गर्दै अन्य दिनहरूमा पनि पूजाआजा गर्न खुला गरिने बताइएको छ।