काठमाडौँ । बैंक तथा डिजिटल भुक्तानी सेवाको नाम प्रयोग गरी भ्रामक सन्देश पठाएर सर्वसाधारणलाई ठगी गर्ने प्रयास बढ्दै गएको भन्दै नेपाल टेलिकमले ग्राहकलाई उच्च सतर्कता अपनाउन आग्रह गरेको छ।
कम्पनीका अनुसार मोबाइल सन्देश सेवाको दुरुपयोग गर्दै विभिन्न बैंक तथा डिजिटल भुक्तानी प्रणालीको नाममा नक्कली सन्देश पठाउने गतिविधि देखिएको छ। यस्ता सन्देशमा खाता निलम्बन भएको, सेवा अस्थायी रूपमा बन्द भएको वा अन्य समस्या देखिएको उल्लेख गर्दै प्रयोगकर्तालाई शंकास्पद वेबसाइट तथा लिंकमा प्रवेश गर्न प्रेरित गरिने गरेको पाइएको छ।
नेपाल टेलिकमले यस्ता सन्देश, फोन कल तथा अपरिचित लिंकप्रति सजग रहन आग्रह गर्दै कुनै पनि सूचना प्राप्त भएमा सम्बन्धित संस्थाको आधिकारिक माध्यमबाट मात्र त्यसको सत्यता पुष्टि गर्न अनुरोध गरेको छ। कम्पनीले आधिकारिक वेबसाइट वा मोबाइल अनुप्रयोगमार्फत जानकारी प्रमाणीकरण गर्नुपर्नेमा जोड दिएको छ।
त्यस्तै, अपरिचित लिंकमा क्लिक नगर्न, एकपटक प्रयोग हुने गोप्य सङ्केत, पासवर्ड, पिन नम्बर तथा कार्डसँग सम्बन्धित संवेदनशील विवरण कसैसँग पनि साझा नगर्न सुझाव दिइएको छ। बैंकिङ तथा डिजिटल भुक्तानी सेवासम्बन्धी जानकारीका लागि सम्बन्धित संस्थाको आधिकारिक माध्यम मात्र प्रयोग गर्न कम्पनीले आग्रह गरेको छ।
शंकास्पद सन्देश, फोन कल वा लिंक प्राप्त भएमा सम्बन्धित बैंक, डिजिटल सेवा प्रदायक वा सरोकारवाला निकायलाई तत्काल जानकारी गराउन पनि अनुरोध गरिएको छ।
ग्राहकको सूचना तथा वित्तीय सुरक्षालाई उच्च प्राथमिकतामा राखिएको उल्लेख गर्दै कम्पनीले यस्ता भ्रामक गतिविधिबाट जोगिन सबै सेवाग्राहीलाई सचेत र जिम्मेवार बन्न अपिल गरेको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
