काठमाडौँ। प्रतिनिधि सभा निर्वाचनको समानुपातिकतर्फको मतगणना अन्तिम चरणमा पुगेको छ। निर्वाचन आयोगले इलाम-१ र गोरखा-१ क्षेत्रबाट जारी समानुपातिक मत गणना छिट्टै पूरा हुने जनाएको छ।
मतगणनाको पछिल्लो परिणामअनुसार राष्ट्रिय स्वतन्त्र पार्टी (रास्वपा) ले प्रत्यक्षतर्फ १२५ सिट जित्दा समानुपातिकतर्फ ५१ लाख ३६ हजार ६७४ मत प्राप्त गरेको छ। नेपाली काँग्रेस प्रत्यक्षतर्फ १८ सिटमा सीमित भए पनि समानुपातिकमा १७ लाख ४८ हजार ३३६ मत पाएको छ। नेकपा एमाले ९ सिटमा झरे पनि समानुपातिकतर्फ १४ लाख ४८ हजार ४१२ मतसहित अग्रस्थानमा रहन सफल भएको छ।
यस्तै, प्रत्यक्षतर्फ सात सिटसहित चौथो भएको नेपाली कम्युनिस्ट पार्टीले ८ लाख ४ हजार १७१ मत पाएको छ। पाँचौँ स्थानको श्रम संस्कृति पार्टीले ३ लाख ७८ हजार ५८७ मत ल्याए। छैटौँ स्थानमा रहेर थ्रेसहोल्ड कटाएको राप्रपाले ३ लाख ७४ हजार ३१४ मत पाएको आयोगले जनाएको छ।
हालसम्म समानुपातिकतर्फ एक करोड ७ लाख ३२ हजार ९३२ मत गणना भइसकेका छन्। प्रत्यक्षतर्फको नतिजा सोमबार नै सार्वजनिक भएको थियो।
यसपल्ट मधेशवादी दलहरू अपेक्षित भन्दा पछाडि परेका छन्। जनता समाजवादी पार्टी (जसपा) ले १ लाख ७४ हजार ३१४ मत पाएको छ भने राष्ट्रिय परिवर्तन पार्टी १ लाख ७१ हजार ४९७ मतसहित अगाडि देखिएको छ। जनमत पार्टीले ७८ हजार ९५३ मत ल्याएको छ।
मत परिणामले राजनीतिक दलहरूको प्रभावक्षेत्र, लोकप्रियता र आगामी प्रतिनिधि सभा सञ्चालनमा महत्वपूर्ण संकेत दिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
