काठमाडौं। राष्ट्रिय स्वतन्त्र पार्टी (रास्वपा) सभापति रवि लामिछानेले आफ्नो चुनावी खर्च विवरण सार्वजनिक गरेका छन्। उनले मंगलबार जिल्ला निर्वाचन कार्यालय चितवनमा उपस्थित भई चितवन–२ क्षेत्रबाट चुनावी अभियानमा भएको खर्चको विवरण बुझाएका हुन्।
उनको विवरणअनुसार कुल ९ लाख ८९ हजार ९८७ रुपैयाँ खर्च भएको छ। मनोनयन दर्ता प्रक्रियामा १० हजार, नमुना मतपत्र छपाइमा ६८ हजार १६१, यातायात तथा इन्धनमा २ लाख ९५ हजार खर्च भएको देखिन्छ।
मतदाता प्रशिक्षणका लागि खाजा व्यवस्थापनमा १४ हजार २ सय रुपैयाँ, वडास्तरीय प्रचारप्रसारमा ४६ हजार खर्च भएको जनाइएको छ। त्यस्तै खाद्यान्न तथा रासन खरिदमा १ लाख २६ हजार, हवाई खर्चमा १३ हजार ६२६ र गोष्ठी तथा भेला आयोजनामा १ लाख ८० हजार खर्च भएको उल्लेख छ।
निर्वाचन ऐनअनुसार उम्मेदवारहरूले निर्वाचनपछि आफ्नो खर्च विवरण समयमै निर्वाचन कार्यालयमा बुझाउनुपर्ने व्यवस्था छ। लामिछानेले सो कानुनी व्यवस्था अनुसार खर्च विवरण पेश गरेका हुन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
