काठमाडौं । बजारमा खाना पकाउने ग्यास अभावको गुनासो बढिरहेका बेला नेपाल आयल निगमले ग्यास उद्योगीहरूसँग छलफल गर्दै आपूर्ति तथा वितरण प्रणालीलाई व्यवस्थित र पारदर्शी बनाउन विशेष निर्देशन दिएको छ । निगमका प्रवक्ता मनोज ठाकुरका अनुसार उद्योगीहरूले ग्यास आपूर्तिमा समस्या नरहेको तर वितरण प्रणालीमा सुधार आवश्यक रहेको बताएका छन् ।
निगमले उद्योगहरूलाई आफ्नो तोकिएको क्षमताअनुसार निरन्तर ग्यास आयात गरी बजारमा पठाउन तथा दैनिक रूपमा कुन विक्रेतालाई कति ग्यास उपलब्ध गराइयो भन्ने स्पष्ट विवरण निगममा बुझाउन निर्देशन दिएको छ । त्यस्तै विक्रेताहरूले पनि ग्यास बिक्री गर्दा कसलाई कति परिमाणमा उपलब्ध गराइयो भन्ने विवरण फोन नम्बर सहित अभिलेखमा राख्नुपर्ने व्यवस्था गरिएको छ ।
ग्यास वितरणका क्रममा घरायसी प्रयोजनलाई पहिलो प्राथमिकतामा राख्नुपर्ने निगमको निर्देशन छ । होटल तथा अन्य व्यावसायिक क्षेत्रभन्दा पहिले सर्वसाधारण उपभोक्तालाई ग्यास उपलब्ध गराउनुपर्ने र व्यावसायिक प्रयोजनमा पठाइएको ग्यासको छुट्टै अभिलेख राख्नुपर्ने बताइएको छ ।
प्रवक्ता ठाकुरका अनुसार नेपालमा ग्यासको आपूर्ति पर्याप्त रहेको र मागअनुसार निरन्तर आयात भइरहेको छ । उनले नेपालको वार्षिक खपत छिमेकी भारतको एक दिनको खपत बराबर मात्र हुने भएकाले आपूर्तिमा समस्या नरहेको बताए ।
निगमले उद्योगी र विक्रेताबाट प्राप्त विवरणका आधारमा वितरण प्रक्रियाको सूक्ष्म अनुगमन गर्ने जनाएको छ । केही विक्रेताले नियमित ग्राहकलाई मात्र प्राथमिकता दिँदा अन्य उपभोक्ताले ग्यास नपाएको गुनासो आएकाले सबैलाई समान रूपमा वितरण गर्न पनि निर्देशन दिइएको छ । निगमका अनुसार नयाँ व्यवस्था कार्यान्वयन भएपछि बजारमा देखिएको कृत्रिम अभाव हट्ने र उपभोक्ताले सहज रूपमा ग्यास पाउने अपेक्षा गरिएको छ ।
