सूर्यविनायक नगरपालिका भक्तपुरको पहिलो पूर्ण खोप सुनिश्चित नगरपालिका घोषणा

भक्तपुर, असार २ ।भक्तपुरको सूर्यविनायक नगरपालिका जिल्लामै पहिलो पूर्ण खोप सुनिश्चित नगरपालिका घोषित भएको छ। जिल्लाका चारवटा नगरपालिकामध्ये सूर्यविनायकले स्वास्थ्य क्षेत्रमा महत्वपूर्ण उपलब्धि हात पार्दै यो मान्यता प्राप्त गरेको हो।

नगरपालिकाको स्वास्थ्य शाखाले शुक्रबार आयोजना गरेको कार्यक्रममार्फत २०७८/०८२ को अवधिमा पूर्ण खोप सुनिश्चितता हासिल गरेको औपचारिक घोषणा गरिएको हो। सो अवसरमा नगर प्रमुख बासुदेव थापाले सबै स्वास्थ्यकर्मीहरूलाई पूर्ण खोप सुनिश्चित नगरको शपथ खुवाउनुका साथै स्वास्थ्य चौकी प्रमुखहरूलाई प्रमाणपत्र वितरण गरे।

सहयोगकर्तालाई धन्यवाद

कार्यक्रममा प्रमुख थापाले स्वास्थ्यकर्मी, वडाध्यक्ष, स्वयंसेवक लगायत सबैको समर्पणले मात्र यो उपलब्धि सम्भव भएको उल्लेख गर्दै सबैलाई आभार प्रकट गरे। उनले भने, “यो उपलब्धि सामूहिक प्रयासको नतिजा हो, खोप सुनिश्चितता नगरको स्वास्थ्य समृद्धिको आधार बनेको छ।”

अनुगमनपछि घोषणा

स्वास्थ्य शाखाका अनुसार, नगरपालिकाका सबै वडामा एकपटक पनि खोप नलगाएका बालबालिका नरहेको पुष्टि भएपछि अनुगमन गरिएको थियो। अनुगमनबाट प्रमाणित भएपछि मात्र सूर्यविनायकलाई पूर्ण खोप सुनिश्चित नगरपालिका घोषणा गरिएको हो।

जन्मदेखि मृत्युसम्मको साथ–नगरपालिकाको प्रतिबद्धता

कार्यक्रममा बोल्दै नगर प्रवक्ता रविन्द्र सापकोटाले नगरपालिकाले जन्मदेखि मृत्युसम्म नागरिकसँग सहकार्य गर्दै आएको बताए। “खोपबाट सुरू भएर मृत्युपछि शववाहनसम्मको व्यवस्था नगरपालिकाले गर्दै आएको छ,” सापकोटाले भने।

भक्तपुर जिल्लाका अन्य नगरपालिका पनि प्रक्रिया मै

जिल्ला जनस्वास्थ्य कार्यालय भक्तपुरकी प्रमुख अञ्जना खड्काले भक्तपुर जिल्लाका बाँकी तीन नगरपालिका पनि पूर्ण खोप सुनिश्चितताको प्रक्रियामा रहेको जानकारी दिइन्। उनले भनिन्, “सूर्यविनायकको उदाहरणअनुसार अरू पालिकाहरू पनि तयार हुँदैछन्। त्यसपछि भक्तपुर जिल्लालाई नै बागमती प्रदेशकै पहिलो पूर्ण खोप सुनिश्चित जिल्ला घोषणा गर्ने योजना छ।”

कार्यक्रममा नगरपालिका वडा नं १ देखि १० सम्मका वडाध्यक्षहरू, विभिन्न स्वास्थ्य चौकीका प्रमुख र स्वास्थ्यकर्मीहरूको उपस्थिति रहेको थियो।