सरकारलाई युवामुखी र विकासोन्मुख नीति ल्याउन सत्तारूढ दलको सुझाव

काठमाडौँ । नेपाल सरकारको आगामी आर्थिक वर्षको नीति तथा कार्यक्रमबारे सत्तारूढ दलहरूले सरकारलाई युवामुखी, उद्यमशीलता प्रवर्द्धन गर्ने र सुशासनमा केन्द्रित नीति ल्याउन सुझाव दिएका छन्।

प्रधानमन्त्री निवास, बालुवाटारमा आज बसेको सत्तापक्षीय राजनीतिक दलहरूको बैठकमा लोकतान्त्रिक गणतन्त्रलाई थप सुदृढ गर्दै अर्थतन्त्रलाई लयमा ल्याउने नीति निर्माणको खाँचो औंल्याइएको थियो। बैठकमा सहभागी नेकपा (एमाले) का उपमहासचिव प्रदीपकुमार ज्ञवालीका अनुसार विकास निर्माणका कामलाई प्रभावकारी, समयबद्ध, र उच्च प्राथमिकतामा राख्दै स्रोतको अपव्यय रोक्न जोड दिइएको छ।

उक्त बैठक प्रधानमन्त्री केपी शर्मा ओलीको आह्वानमा आहुत गरिएको हो, जसमा यही वैशाख १९ गते राष्ट्रपति रामचन्द्र पौडेलबाट सङ्घीय संसद्को दुवै सदनमा प्रस्तुत हुन गइरहेको नीति तथा कार्यक्रममाथि छलफल गरिएको हो।

बैठकमा युवा पुस्तामा आशा जगाउन स्टार्ट अप, सीप विकास, उद्यमशीलता, व्यावसायिक विकास तथा बजार विस्तारमा केन्द्रित एकीकृत कार्यक्रम ल्याउन सरकारलाई आग्रह गरिएको थियो। साथै, अनावश्यक संरचना निर्माण र फजुल खर्चलाई निर्ममतापूर्वक कटौती गर्ने, सुशासन तथा कार्यदक्षता बढाउने र अन्तर्राष्ट्रिय सम्बन्ध सुदृढ गर्ने कुरामा पनि विशेष जोड दिइएको थियो।

बैठकमा बसाइँसराइको व्यवस्थापनका लागि पहाड केन्द्रित कृषि तथा पशु विकासका कार्यक्रमहरू ल्याई ‘मेजर ब्रेक थ्रु’ गर्ने खालको बजेट आउनुपर्ने नेताहरूको धारणा थियो।

पत्रकारहरूसँग कुराकानी गर्दै ज्ञवालीले आन्दोलनरत शिक्षकहरूसँग सरकारको वार्ता भइरहेको र चाँडै सहमति भई सामुदायिक विद्यालय सञ्चालनको वातावरण बन्ने विश्वास व्यक्त गरे।

बैठकमा प्रधानमन्त्री एवं एमाले अध्यक्ष केपी शर्मा ओली, नेपाली कांग्रेसका सभापति एवं पूर्वप्रधानमन्त्री शेरबहादुर देउवा, उपसभापति पूर्णबहादुर खड्का, परराष्ट्रमन्त्री डा. आरजु राणा देउवा, एमालेका वरिष्ठ उपाध्यक्ष ईश्वर पोखरेल, महासचिव शङ्कर पोखरेल, उपमहासचिवहरू प्रदीपकुमार ज्ञवाली, विष्णुप्रसाद रिमाल, लोकतान्त्रिक समाजवादी पार्टी नेपालका अध्यक्ष महन्थ ठाकुर, जनता समाजवादी पार्टीका अध्यक्ष अशोककुमार राईलगायत नेताहरूको सहभागिता रहेको थियो।