प्रधानमन्त्री ओलीविरुद्ध अवहेलना सम्बन्धी निवेदनको पेसी न्यायाधीशद्वय सुवेदी र पाण्डेयको इजलासमा

काठमाडौँ , ४ फागुन । प्रधानमन्त्री केपी शर्मा ओलीविरुद्ध सर्वोच्च अदालतमा आज अदालत अवहेलनासम्बन्धी मुद्दाको सुनुवाइ हुने भएको छ। माघ २८ गते दायर गरिएको मुद्दामा ओली र भूमि व्यवस्था मन्त्री बलराम अधिकारीलाई विपक्षी बनाइएको हो। उक्त मुद्दा गिरीबन्धु टी इस्टेट्ससँग सम्बन्धित सर्वोच्च अदालतको आदेशको कार्यान्वयन नगरेको आधारमा दायर गरिएको हो। यो निवेदनको पेसी न्यायाधीशद्वय शारङ्गा सुवेदी र नित्यानन्द पाण्डेयको इजलासमा परेको छ ।

अधिवक्ता ओमप्रकाश अर्यालका अनुसार, प्रधानमन्त्री ओलीले सर्वोच्च अदालतको माघ २४ को परमादेश कार्यान्वयनमा अनवरत अवरोध गर्दै आएका छन्। परमादेशमा हदबन्दीभन्दा बढी देखिएको र चिया उद्योगमा उपयोग नगरिएको झापाको गिरीबन्धु टी स्टेटको जग्गा नेपाल सरकारको नाममा लिने व्यवस्था गरिएको थियो। तर, प्रधानमन्त्री र मन्त्रीले यस कार्यमा बारम्बार अवरोध गरेको आरोप लगाइएको छ।

अर्यालका अनुसार, भूमि सम्बन्धी ऐन, २०२१ अनुसार उक्त जग्गा सरकारले प्राप्त गर्नुपर्ने भए पनि यसमा अवरोध पुर्याइएको छ। साथै, पछिल्लो समय भूमि व्यवस्था मन्त्री र प्रधानमन्त्रीले अध्यादेश ल्याएर थप बाधा पुर्याएको पनि आरोप छ। आजको सुनुवाइको दौरान अदालत यस मुद्दामा निर्णय गर्नेछ।