पशुपति धर्मशालाको अध्ययनका लागि ६ सदस्यीय समिति गठन

काठमाडौँ ,६ कात्तिक ।  पशुपति धर्मशालाको विषयमा गहन अध्ययन गर्न संस्कृति, पर्यटन तथा नागरिक उड्डयन मन्त्रालयले ६ सदस्यीय समिति गठन गरेको छ।

सोमबार साँझ मन्त्रालयले जारी गरेको प्रेस विज्ञप्तिमा उल्लेख गरिएको छ कि धर्मशालाको अध्ययन गर्न सहसचिव र संस्कृति महाशाखा प्रमुखको नेतृत्वमा समिति गठन गरिएको छ।

समितिमा पशुपति क्षेत्र विकास कोषका कार्यकारी निर्देशक, भूमि व्यवस्था, सहकारी तथा गरिबी निवारण मन्त्रालयका उपसचिव, कानुन न्याय तथा संसदीय मामिला मन्त्रालयका उपसचिव, पुरातत्व विभागका उपसचिव, र संस्कृति, पर्यटन तथा नागरिक उड्डयन मन्त्रालयका संस्कृति शाखाका उपसचिव सदस्यका रूपमा रहेका छन्।

समितिले गौशाला धर्मशाला स्थापनादेखि हालसम्मको अवस्थाको अध्ययन, धर्मशालाको आयव्ययको विवरण, लेखा परीक्षण स्थिति, सम्पत्ति र दायित्व, निर्माण गरिएको संरचना र गौशाला धर्मशालाबाट प्रदान गरिएको सेवाको प्रकृति र अवस्था अध्ययन गर्ने कार्य जिम्मा पाएको छ।

साथै, समितिलाई अदालतबाट प्राप्त आदेश र फैसलाको कार्यान्वयन, अख्तियार दुरुपयोग अनुसन्धान आयोग, सार्वजनिक लेखा समिति, महालेखा परीक्षकका प्रतिवेदनहरू, विभिन्न समयमा गठन भएका समितिहरूका प्रतिवेदन, र मन्त्रालय तथा पशुपति क्षेत्र विकास कोषका निर्णयहरूको पनि अध्ययन गर्न भनिएको छ।