विश्वविद्यालयहरूमा राजनीतिक भागबण्डा हुने छैन, मेरिटोक्रेसीका आधारमा पदाधिकारीहरू नियुक्त हुन्छन् : प्रधानमन्त्री

काठमाडौं, पुस १७ । प्रधानमन्त्री पुष्पकमल दाहालले आफूले विश्वविद्यालय लगायतका शिक्षाका सम्पूर्ण संरचनामा प्रतिस्पर्धा गराउन चाहेको भन्दै त्यसका लागि तयार रहन प्राज्ञहरूलाई आग्रह गरेका छन् । मंगलबार बिहान काठमाडौंमा आयोजित कान्तिपुर एजुकेशन समिट (शैक्षिक बहस) मा बोल्दै प्रधानमन्त्रीले उक्त कुरा बताएका हुन् ।

प्रधानमन्त्री दाहाल ‘प्रचण्ड’ले शैक्षिक नीति, पाठ्यक्रम र संरचनामा रूपान्तरण जरूरी रहेकाले  प्रतिस्पर्धामार्फत शिक्षाको गुणस्तर उकास्न  पहल लिने बताएका हुन।  विश्वविद्यालयहरूमा राजनीतिक भागबण्डा नहुने , मेरिटोक्रेसीका आधारमा उपकुलपति लगायतका पदाधिकारीहरू नियुक्त हुने भएकाले योग्यहरूले जिम्मेवारी प्राप्त गर्ने र अवसरको ढोका खुल्ने  आशा व्यक्तm गरे ।

उनले भने, ‘‘मैले घोषणा गरिसकेको छु– अब विश्वविद्यालयहरूमा राजनीतिक भागबण्डा हुने छैन । मेरिटोक्रेसीका आधारमा उपकुलपति लगायतका पदाधिकारीहरू नियुक्त हुनेछन् । म मेरो सङ्कल्पमा दृढ छु । यसले योग्यहरूले जिम्मेवारी प्राप्त गर्ने अवसरको ढोका खुल्नेछ, विश्वविद्यालयका पदाधिकारीहरूले उच्च मनोबलका साथ आफ्नो विज्ञता प्रस्तुत गर्ने वातावरण मिल्नेछ, विद्यार्थी, अभिभावक लगायत आम जनसमुदायमा उच्च शिक्षा र पदाधिकारीहरूप्रति भरोसा बढ्नेछ ।’’