दाउन्नेमा भारतीय कन्टेनर दुर्घटना: तीन बस र मोटरसाइकलमा ठक्कर, नौ घाइते

नवलपुर । पूर्व–पश्चिम राजमार्गअन्तर्गत नवलपुरको दाउन्ने क्षेत्रमा भारतीय नम्बर प्लेटको कन्टेनर दुर्घटना हुँदा नौ जना घाइते भएका छन्।

जिल्ला प्रहरी कार्यालय नवलपुरका अनुसार सुनौलीबाट नारायणघाटतर्फ जाँदै गरेको युपी २१ बीटी २७९१ नम्बरको कन्टेनरले ओभरटेक गर्ने क्रममा नियन्त्रण गुमाएर तीनवटा बस र एउटा मोटरसाइकललाई ठक्कर दिएको हो। दुर्घटना विनयी त्रिवेणी गाउँपालिका–२ घिउखोला नजिकै भएको प्रहरीले जनाएको छ।

कन्टेनरले काठमाडौँबाट सुर्खेततर्फ जाँदै गरेको बसलाई ठक्कर दिएपछि उक्त बसले फेरि अर्को दुई बस र एउटा मोटरसाइकललाई ठक्कर दिएको थियो। दुर्घटनामा मोटरसाइकलमा सवार दुई जना तथा बसमा रहेका केही यात्रु घाइते भएका छन्। घाइतेहरूलाई उपचारका लागि नजिकैका अस्पतालमा पठाइएको प्रहरीले जनाएको छ।

प्रहरीले घटनाबारे थप अनुसन्धान गरिरहेको छ।