श्रीलंकालाई ४१ रनले हराउँदै भारत एसिया कपको फाइनलमा

काठमाडौँ, २७ भाद्र । एसिया कप २०२३ को सुपर फोर समूहको आफ्नो दोस्रो खेलमा भारतले श्रीलंकालाई ४१ रनले पराजित गरेको छ । योसँगै टीम इन्डिया एशिया कप २०२३ को फाइनलमा प्रवेश गरेको छ । पहिले ब्याटिङ गरेको भारतले ४९.१ ओभरमा २१३ रन बनाएको थियो । जवाफमा श्रीलंकाको टोली ४१.३ ओभरमा १७२ रनमा सिमित भयो। भारतका लागि कप्तान रोहित शर्माले सर्वाधिक ५३ रन बनाए । राहुलले ३९ र किशनले ३३ रनको योगदान दिए । श्रीलंकाका लागि डुनिथ भेलालागेले ५ विकेट लिए भने चरिथ असालान्काले ४ विकेट लिए । श्रीलंकाको इनिङ्समा डुनिथ भेलालागेले सर्वाधिक ४२* रन बनाए। धनञ्जय डि सिल्भाले ४१ रनको योगदान दिए । भारतका लागि कुलदीप यादवले ४ विकेट लिए । जसप्रित बुमराह र रविन्द्र जडेजाले २–२ विकेट लिए ।

भारतले फाइनलमा श्रीलंका र पाकिस्तानबीचको खेलको विजेतासँग भिड्ने सम्भावना छ । तर, वर्षाका कारण खेल रद्द भएमा समीकरण फेरिन सक्छ तर बंगलादेशको टोली फाइनलको दौडबाट बाहिर छ र फाइनलमा भारतीय टोलीको स्थान पक्का भएको छ ।

भारतीय कप्तान रोहित शर्माले टस जितेर पहिले ब्याटिङ गर्ने निर्णय गरे  । पिच हेर्दा टिम इन्डियाले शार्दुल ठाकुरको स्थानमा अक्षर पटेललाई मौका दिएको छ । रोहित र गिलको जोडीले फेरि उत्कृष्ट सुरुवात गरेको थियो । उनीहरुले पावरप्लेमा ६५ रन जोडे । रोहित र गिलबीच ११.१ ओभरमा पहिलो विकेटका लागि ८० रनको साझेदारी भएको थियो ।
डुनिट भेलाल्गेले गिललाई क्लिन बलिङ गर्दै यो साझेदारी तोडेका थिए। अर्को ओभरमा उनले विराट कोहलीलाई पनि तीन रनको स्कोरमा आउट गरे र आफ्नो तेस्रो ओभरमा भेलाल्गेले रोहितलाई पनि बोल्ड गरे र टीम इन्डिया समस्यामा पर्यो। आउट हुनुअघि रोहितले ४८ बलमा सात चौका र दुई छक्काको मद्दतले ५३ रन बनाएका थिए । एसिया कपमा उनले लगातार तेस्रो इनिङ्समा अर्धशतक बनाए र एकदिवसीय क्रिकेटमा आफ्नो १० हजार रन पनि पूरा गरे। यो उनको एकदिवसीय क्रिकेटमा ५१ औं अर्धशतक हो ।

भारतले ९१ रनमा तीन विकेट खसेपछि इशान किशन र लोकेश राहुलले इनिङ्सको जिम्मा लिएका थिए । दुवैबीच अर्धशतकीय साझेदारी भयो र टीम इन्डियाको स्कोर १५० रन पार भयो। ३९ रनको स्कोरमा लोकेश राहुललाई आउट गर्दै भेलाल्गेले भारतलाई चौथो झटका दिए । त्यसको केही समयपछि इशान किशन पनि ६१ बलमा ३३ रनको संघर्षपूर्ण इनिङ्स खेलेर चरित असलंकाको शिकार बने । अर्को ओभर भेलाल्गेको स्पेलको अन्तिम ओभर थियो र उनले अन्तिम बलमा पाँच रनको व्यक्तिगत स्कोरमा हार्दिक पाण्ड्यालाई प्याभिलियन पठाए। भेलालागेले पहिलो पटक एकदिवसीय क्रिकेटमा पाँच विकेट लिने उपलब्धि हासिल गरेका छन् ।

रविन्द्र जडेजा पनि १९ बलमा चार रन बनाएर असलंकाको शिकार बने । यसपछि असलंकाले बुमराहलाई पाँच रनको स्कोरमा बोल्ड गरे। अर्को बलमा कुलदीप पनि खाता नखोल्दै आउट भए । भारतले १८६ रनमा नौ विकेट गुमाएको थियो । यस्तो अवस्थामा सिराज र अक्षरले अन्तिम विकेटका लागि २७ रनको साझेदारी गर्दै भारतको स्कोर २१३ रनमा पुर्याएका थिए । तर, टीम इन्डियाले यस प्रतियोगितामा दोस्रो पटक पूरा ५० ओभर खेल्न सकेन र ४९.१ ओभरमा २१३ रनमा सिमित भयो। श्रीलंकाका लागि भेलालागेका पाँच विकेटका अलावा चारिथ असालान्काले चार विकेट लिए । महिष तिक्षनाले एक विकेट लिए । यस इनिङ्समा सबै विकेट स्पिन बलरले लिएका थिए ।

२१४ रनको लक्ष्य पछ्याउन आएको श्रीलंकाको टोलीको सुरुवात राम्रो हुन सकेन । जसप्रित बुमराहले आफ्नो दोस्रो ओभरमा पथुम निसान्कालाई आउट गरे। उनले ६ रन मात्र बनाउन सके । यसपछि उनले कुसल मेन्डिसलाई पनि १५ रनको व्यक्तिगत स्कोरमा आउट गरे। सोही क्रममा सिराजले करुणारत्नेको विकेट लिए । २५ रनमा तीन विकेट गुमाएपछि श्रीलंकाको टोली संघर्षरत थियो । यस्तो अवस्थामा सादिरा समरविक्रमा र चरित असालान्काले साझेदारी बनाएर भारतको समस्या बढाए तर कुलदीपले समरविक्रमालाई आउट गरेर साझेदारी तोडेका थिए । असलंका पनि कुलदीपको शिकार बनिन् । दासुन शनाकालाई जडेजाले व्यक्तिगत ९ रनमा आउट गरेका थिए ।

श्रीलंकाले ९९ रनमा ६ विकेट गुमाएको थियो । यसपछि धनञ्जय डि सिल्भाले डुनिट भेलाल्गेसँग अर्धशतकीय साझेदारी गर्दै भारतीय टोलीको मुटुको धड्कन बढाएका थिए । तर, जडेजाले धनन्जयलाई आउट गर्दै भारतको जितमा शिलबन्दी गरे । धनन्जय ४१ रन बनाएर आउट भए । यसपछि तिक्षिनालाई हार्दिकले आउट गरे भने कुलदीपले आफ्नो अन्तिम ओभरमा रजिता र पाथिरानालाई आउट गर्दै श्रीलंकाको इनिङ्स १७२ रनमा समेटेका थिए। भेलालागे ४२ रन बनाएर अविजित रहे । भारतका लागि कुलदीप यादवले सर्वाधिक ४ विकेट लिए । बुमराह र जडेजाले दुई दुई विकेट लिए ।