बजेट कार्यान्वयनमा अपेक्षित प्रगति नभएपछि मुख्यमन्त्रीको चासो

सुर्खेत । कर्णाली प्रदेशका मुख्यमन्त्री यामलाल कडेलले चालु आर्थिक वर्षको पूँजीगत बजेट कार्यान्वयनमा तीव्रता दिन मन्त्री र सचिवहरूलाई निर्देशन दिएका छन्।

चालु आर्थिक वर्षको तेस्रो त्रैमासिक प्रगतिकाे समिक्षा बैठकमा मुख्यमन्त्रीले बाँकी अवधिलाई निर्णायक बताउँदै बजेट कार्यान्वयनको गति अझ बढाउनु आवश्यक रहेको बताएका थिए। प्रदेश सरकारले यस वर्ष कुल बजेटको ८० प्रतिशत कार्यान्वयन गर्ने लक्ष्य लिएको भए पनि हालसम्म सोअनुसारको प्रगति देखिन नसकेको उल्लेख गरिएको छ।

मुख्यमन्त्री कडेलले विगतमा जनशक्ति अभावका कारण काम प्रभावित भएको उल्लेख गर्दै अहिले पर्याप्त जनशक्ति हुँदाहुँदै पनि लक्ष्यअनुरूपको नतिजा नआउनुको कारणबारे सचिवहरूलाई प्रश्न उठाएका थिए।

उनले मन्त्रालयहरूले प्रयासरत देखिए तापनि सन्तोषजनक परिणाम नआएकोतर्फ ध्यानाकर्षण गराएका छन्। उनले सरकारी कामलाई चिठी पठाएर मात्रै नटुंग्याई प्रत्यक्ष अनुगमन र निरन्तर फोलोअप आवश्यक भएको धारणा व्यक्त गरेका थिए।

बैठकमा मुख्यमन्त्रीले मन्त्रालयहरूले सुशासन, बजेट कार्यान्वयन र परिणाममुखी सेवा प्रवाहमा अझ बढी उत्तरदायी बन्नुपर्ने उल्लेख गरेका थिए। उनले अनुशासनका नाममा कार्य सम्पादनमा ढिलासुस्ती हुन नहुने भन्दै स्पष्ट ढाँचामा कार्ययोजना बनाइ अगाडि बढ्न निर्देशन दिएका छन्।

मुख्यमन्त्री कडेलले आगामी वर्षकाे नीति, कार्यक्रम र बजेट तयारी पनि प्रभावकारी ढंगले अघि बढाउन निर्देशन दिएका छन्। उनले परम्परागत शैलीको भन्दा फरक ढंगले जनतालाई प्रत्यक्ष लाभ पुग्ने कार्यक्रमहरू समेट्नुपर्ने आवश्यकता औंल्याएका छन्।