लोकतन्त्रमा अन्तिम निर्णय जनताकै हुन्छ:ओली

काठमाडौँ । नेकपा एमालेका अध्यक्ष केपी शर्मा ओलीले प्रतिनिधि सभा निर्वाचनमा आफूले सोचेअनुसार परिणाम नआएको स्वीकार गरेका छन्। उनले यसपटकको चुनावमा व्यक्तिगत रूपमा पनि र आफ्नो पार्टी एमालेले पनि अपेक्षा गरेजस्तो नतिजा ल्याउन नसकेको बताएका हुन्।

ओलीले लोकतन्त्रमा अन्तिम निर्णय जनताकै हुने भन्दै जनताले दिएको मतलाई सम्मानका साथ स्वीकार गर्ने बताएका छन्। कठिन अवस्थामा पनि सूर्य चिन्हमा मतदान गरेर साथ दिने सबै मतदाता, नेता, कार्यकर्ता, स्वयंसेवक र समर्थकप्रति उनले धन्यवाद व्यक्त गरेका छन्।

उनले मतदाताको विश्वास नै पार्टीको ठूलो शक्ति भएको उल्लेख गर्दै चुनावको नतिजा आफूहरूको पक्षमा नआए पनि जनताको सेवा गर्ने प्रतिबद्धता कमजोर नहुने बताएका छन्।

ओलीका अनुसार एमाले आगामी दिनमा पनि जनताकै बीचमा रहेर जनताका समस्या र आवश्यकताका लागि काम गर्दै अघि बढ्नेछ। साथै, जनतासँगको विश्वास र सम्बन्धलाई अझ बलियो बनाउँदै लैजाने प्रतिबद्धता पनि उनले व्यक्त गरेका छन्।