सोविता गौतमद्वारा निर्वाचन खर्च विवरण आयोगमा पेश, खर्च नौ लाख

काठमाडौँ। प्रतिनिधि सभा सदस्य निर्वाचनअन्तर्गत चितवन जिल्ला निर्वाचन क्षेत्र नम्बर ३ बाट उम्मेदवार बनेकी सोविता गौतमले आफ्नो निर्वाचन खर्चको विवरण निर्वाचन आयोगमा पेश गरेकी छन्। प्रतिनिधि सभा सदस्य निर्वाचन ऐन, २०७४ को दफा ७२ तथा निर्वाचन आयोगले स्वीकृत गरेको निर्वाचन आचारसंहिताअनुसार उनले सम्पूर्ण खर्च विवरण सम्बन्धित जिल्ला निर्वाचन कार्यालय चितवनमार्फत आयोगमा बुझाएकी हुन्।

पेश गरिएको विवरणअनुसार मनोनयन दर्तामा पाँच हजार रुपैयाँ खर्च भएको उल्लेख छ। निर्वाचन प्रचारप्रसार सामग्रीमा तीन लाख छयानब्बे हजार आठ सय रुपैयाँ खर्च गरिएको छ भने मतदाता प्रशिक्षणका लागि एक दिनको कार्यक्रम सञ्चालन गरी बीस हजार रुपैयाँ खर्च भएको जनाइएको छ। नमुना मतपत्र तथा घोषणा पत्र छपाइमा अठसठ्ठी हजार दुई सय रुपैयाँ खर्च भएको छ।

त्यसैगरी २८ वटा वडामा गरिएको प्रचारप्रसार कार्यक्रममा एक लाख  खर्च गरिएको विवरणमा उल्लेख छ। सवारी साधन भाडा, चालक र इन्धनसहित तीन लाख पच्चीस हजार रुपैयाँ खर्च भएको छ। कार्यालय प्रयोजनका सामग्रीमा तेइस हजार चार सय पैंतालीस रुपैयाँ तथा खाद्यान्न, रासन र पानी व्यवस्थापनमा एक लाख अठार हजार रुपैयाँ खर्च भएको उल्लेख गर्दै कुल नौ लाख त्रियानब्बे हजार पैंतालीस रुपैयाँ खर्च भएको विवरण पेश गरिएको छ।