चैत्रको पहिलो साताभित्र समानुपातिक सांसदलाई प्रमाणपत्र दिन्छौँ :निर्वाचन आयोग

काठमाडौं । निर्वाचन आयोगले फागुन २१ गते सम्पन्न प्रतिनिधिसभा निर्वाचनसम्बन्धी सबै काम चैतको पहिलो साताभित्र सकिने जनाएको छ।

आयोगका प्रवक्ता नारायणप्रसाद भट्टराईका अनुसार समानुपातिकतर्फको मतगणना मंगलबारसम्म सकिने अनुमान गरिएको छ। मतगणना सकिएपछि दलहरूले पाएको मत प्रतिशतका आधारमा समानुपातिक सूचीबाट निर्वाचित हुने उम्मेदवारहरूको नाम सम्बन्धित दलसँग माग गरिनेछ।

दलहरूले पठाएको नामलाई क्लस्टरअनुसार जाँच गरेर अन्तिम सूची तयार पारिने र त्यसपछि निर्वाचित सदस्यहरूलाई प्रमाणपत्र प्रदान गरिने आयोगले जनाएको छ।

यसअघि प्रत्यक्षतर्फ विजयी उम्मेदवारहरूलाई सम्बन्धित निर्वाचन अधिकृतको कार्यालयबाट प्रमाणपत्र दिइसकिएको छ। यस पटकको निर्वाचनमा प्रत्यक्ष र समानुपातिक दुवैतर्फ राष्ट्रिय स्वतन्त्र पार्टी अग्रस्थानमा रहेको आयोगले जनाएको छ।