पराजयपछि रवीन्द्र मिश्रद्वारा पार्टी जिम्मेवारीबाट राजीनामा

काठमाडौं । राष्ट्रिय प्रजातन्त्र पार्टीका नेता रवीन्द्र मिश्रले पार्टी राजनीतिबाट तत्कालका लागि अलग हुने घोषणा गरेका छन्। काठमाडौं निर्वाचन क्षेत्र नम्बर १ बाट प्रतिनिधिसभा सदस्य पदका उम्मेदवार रहेका मिश्र यसपटक पनि पराजित भएपछि उनले पार्टीका सबै जिम्मेवारीबाट राजीनामा दिएको बताएका हुन्। सामाजिक सञ्जालमार्फत सार्वजनिक गरेको वक्तव्यमा उनले आफूले धेरै सोचविचारपछि यस्तो निर्णय लिएको स्पष्ट पारेका छन्।

मिश्रले देशभर राजसंस्था पुनःस्थापनाको पक्षमा जनमत देखिए पनि त्यसलाई संगठित गर्न पार्टी सफल हुन नसकेको स्वीकार गरेका छन्। पार्टीको वरिष्ठ उपाध्यक्षको जिम्मेवारीमा रहँदा त्यसका लागि आफू पनि जिम्मेवार रहेको उनको भनाइ छ।

उनले अब राजसंस्था पुनःस्थापना, सुशासन र राष्ट्रिय हितका मुद्दामा आफ्नो धारणा यथावत राख्दै केही समय स्वतन्त्र रूपमा विचार अभिव्यक्त गर्ने बताए। करिब ९ वर्षको राजनीतिक यात्रामा साथ दिने सबैप्रति उनले आभार व्यक्त गरेका छन्। साथै निर्वाचनमा सफलता हासिल गरेको राष्ट्रिय स्वतन्त्र पार्टीलाई बधाई पनि दिएका छन्।