सर्वोच्च नेताको निधनपछि मोज्तबा खामेनी उत्तराधिकारी

काठमाडौं– संयुक्त अमेरिकी–इजरायली हवाई आक्रमणमा इरानका सर्वोच्च नेता अयातोल्लाह अली खामेनीको मृत्यु भएपछि उनका छोरा मोज्तबा होसेनी खामेनीलाई नयाँ सर्वोच्च नेताका रूपमा चयन गरिएको छ। इजरायली सञ्चारमाध्यमका अनुसार इरानको एसेम्बली अब एक्सपर्टले औपचारिक प्रक्रिया पूरा गर्दै मोज्तबालाई उत्तराधिकारी घोषणा गरेको हो।

गत फेब्रुअरी २८ मा भएको संयुक्त हवाई आक्रमणमा खामेनी आफ्नै निवास क्षेत्रमा रहँदा मारिएको बताइएको छ। उक्त आक्रमणमा उनका परिवारका अन्य सदस्यको समेत ज्यान गएको र उनकी पत्नी गम्भीर घाइते भई उपचारका क्रममा निधन भएको जनाइएको छ।

खामेनीको अन्त्येष्टि मशादमा गरिने तथा तेहरानमा ठूलो श्रद्धाञ्जली सभा आयोजना गर्ने तयारी भइरहेको छ, यद्यपि मिति सार्वजनिक गरिएको छैन। खामेनीले जीवनकालमा औपचारिक रूपमा उत्तराधिकारी नतोकेकाले यसअघि अन्तरिम नेतृत्व परिषद्ले जिम्मेवारी सम्हाल्दै आएको थियो। अब मोज्तबा खामेनीको चयनसँगै इरानको सर्वोच्च नेतृत्वमा स्थायित्व आउने अपेक्षा गरिएको छ।