सलमान खानका बुबा सलीम खान भेन्टिलेटरमा

काठमाडौँ । अनुभवी पटकथा लेखक सलीम खानलाई अचानक स्वास्थ्य समस्या आएपछि भेन्टिलेटर सपोर्टमा राखिएको छ। सञ्चारमाध्यमको रिपोर्ट अनुसार ९० वर्षीय खानको रक्तचाप अत्यधिक बढेपछि मस्तिष्कको दाहिने भागमा आन्तरिक रक्तस्राव भएको हो। डाक्टरका अनुसार रक्तनली फुटेकाले यो अवस्था आएको र तत्काल उपचार सुरु गरिएको थियो।

उहाँलाई मंगलबार बिहान मुम्बईस्थित लीलावती अस्पतालमा भर्ना गरिएको हो। अस्पतालले साँझ जारी गरेको स्वास्थ्य बुलेटिनमा सलीम खानको अवस्था हाल स्थिर रहेको तर नजिकबाट चिकित्सकीय निगरानी भइरहेको जनाएको छ। डाक्टरहरूको टोलीले बुधबार बिहान शल्यक्रिया गर्ने तयारी गरिरहेको छ।

सलीम खानको उपचारमा न्युरोलोजिस्ट, कार्डियोलोजिस्ट र न्युरोसर्जनसहितको विशेषज्ञ टोली संलग्न छ। निर्धारित उपचार अघि उहाँको अवस्था निरन्तर निगरानीमा राखिएको अस्पतालले जनाएको छ।

यसैबीच, उहाँ अस्पताल भर्ना भएको खबर फैलिएपछि परिवारका सदस्यहरू अस्पतालमा भेला भएका छन्। उहाँका छोरा तथा अभिनेता सलमान खान पनि मंगलबार अस्पताल पुगेका थिए। सलमानले सञ्चारकर्मीहरूसँग कुरा नगरे पनि बुबाको साथमा बसेर हेरचाह गरिरहेका देखिएका छन्।