आजदेखि दोस्रो एनपिएल ,जनकपुर र काठमान्डु खेल्दै

काठमाडौँ । नेपाल प्रिमियर लिग (एनपिएल) को दोस्रो संस्करण आजदेखि कीर्तिपुरको त्रिभुवन विश्वविद्यालय क्रिकेट मैदानमा सुरु हुँदैछ। नेपाल क्रिकेट सङ्घका अध्यक्ष चतुरबहादुर चन्दका अनुसार उद्घाटन कार्यक्रम दिउँसो २ बजे हुनेछ भने पहिलो खेल ४ बजे सुरु हुनेछ। प्रतियोगिता मङ्सिर २७ गतेसम्म चल्नेछ र यसमा लिग चरणदेखि प्लेअफ र फाइनल मिलाएर ३२ खेल हुनेछन्।

यस पटक त्रिवि क्रिकेट मैदानमा ठूलो परिवर्तन गरिएको छ। ३० हजार दर्शक अट्ने प्यारापिट निर्माण गरिएको छ, जसले गर्दा दर्शकले आरामसँग सिटमै बसेर खेल हेर्न सक्नेछन्। साथै, फ्लड लाइट जडान भएकाले अब रातिमा पनि खेल चल्नेछ। उद्घाटन खेल साविक विजेता जनकपुर बोल्ट्स र काठमाडौँ गोर्खाजबीच हुनेछ।

खेल जित्ने टोलीले रु १ करोड १० लाख पुरस्कार पाउनेछ। उपविजेताले रु ५१ लाख, तेस्रो स्थानले रु २५ लाख र चौथो स्थानले रु १५ लाख प्राप्त गर्नेछन्। सबै खेल कीर्तिपुरमै हुनेछन्।

क्यानका अनुसार दैनिक ९,४५० टिकट बिक्री गरिनेछ। पहिलो दिनको टिकट दुई दिनअगाडि नै सकिएको छ। शनिबारका लागि सामान्य टिकट ५०० र प्रिमियम १,५०० राखिएको छ। अन्य दिन सामान्य ५०० र प्रिमियम १,००० रहनेछन्। प्लेअफका खेलमा सामान्य १,००० र प्रिमियम २,००० पर्नेछ। सिजनल टिकट भने १५,००० मा उपलब्ध हुनेछ।

एनपिएलमा आठ फ्रेन्चाइज टोलीले प्रतिस्पर्धा गर्दैछन्। क्यानले यस संस्करणबाट करिब ४० करोड आम्दानी गर्ने लक्ष्य राखेको छ।दोस्रो एनपिएलको पहिलो खेलमा सोमबार साँझ ४ बजे च्याम्पियन जनकपुर बोल्ट्सले काठमान्डु गोर्खाजको सामना गर्ने छ ।