सार्वजनिक सम्पत्ति जोगाउन प्रहरीलाई बल प्रयोगको आदेश

काठमाडौं । काठमाडौंका प्रमुख जिल्ला अधिकारी (सीडीओ) छवि रिजालले सुरक्षाकर्मीहरूलाई आवश्यक परेमा रबरको गोली प्रहार गर्न आदेश दिएका छन्। उनले सार्वजनिक सम्पत्ति संरक्षणका लागि यस्तो निर्देशन दिएको काठमाडौंका सहायक प्रमुख जिल्ला अधिकारी मुक्ति रिजालले जानकारी दिए।

उनका अनुसार सार्वजनिक सम्पत्तिमाथि आक्रमण भएमा सुरक्षाकर्मीहरूले चेतावनी दिएर सामान्य बल प्रयोग गर्न सक्ने र अवस्था नियन्त्रणमा नभएमा मात्रै रबरको गोली प्रयोग गर्न सक्ने आदेश दिइएको हो।

सहायक प्रमुख जिल्ला अधिकारी रिजालले सो आदेश कुनै व्यक्तिमाथि सोझै गोली प्रहार गर्न नभएको स्पष्ट पारे। उनले भने, “यो आदेश सार्वजनिक सम्पत्ति जोगाउन र परिस्थिति नियन्त्रणमा लिनका लागि हो।”

तर अहिलेसम्म कति जनामाथि गोली प्रहार गरिएको छ वा कति घाइते भएका छन् भन्नेबारे आधिकारिक तथ्यांक उपलब्ध नभएको उनले जानकारी दिए।