नागढुंगा प्रहरीबीचको कुटपिट घटना: दुवैलाई सोधपुछका लागि बोलाइयो

काठमाडौँ । काठमाडौँको नागढुंगामा एक ट्राफिक प्रहरीले अर्का प्रहरी जवानलाई कुटपिट गरेको घटनापछि दुवै प्रहरीलाई जिम्मेवारीबाट हटाइएको छ। सामाजिक सञ्जालमा ट्राफिक प्रहरीले आफ्नै सहकर्मीलाई कुटेको भिडियो सार्वजनिक भएपछि घटनाको छानबिन सुरु गरिएको हो।

बुधबार दिउँसो सार्वजनिक भएको भिडियोमा ट्राफिक प्रहरी प्रभाग नागढुंगाका प्रमुख, इन्स्पेक्टर जितेन्द्र कुमार साहले प्रहरी सहायक हवल्दार अमर खड्कालाई थप्पड हानेको देखिन्छ। भिडिओ भाइरल भएपछि दुवै जनालाई सोधपुछका लागि काठमाडौं उपत्यका ट्राफिक प्रहरी कार्यालयमा बोलाइएको छ।

प्रहरी प्रशासनले अनुशासनको उल्लंघन भएको भन्दै घटनामा संलग्न दुवै प्रहरीलाई हालका जिम्मेवारीबाट हटाएर आन्तरिक छानबिन प्रक्रिया अघि बढाएको जनाएको छ। भिडिओ सार्वजनिक भएपछि आम नागरिक र सामाजिक सञ्जाल प्रयोगकर्ताहरूले प्रहरी संगठनभित्रको व्यवहार र अनुशासनमाथि प्रश्न उठाएका छन्।