हत्कडीसहित फरार अभियुक्त भारतबाट पक्राउ , दुई प्रहरी निलम्बन

कैलाली , १५ वैशाख — कैलाली जिल्ला सरकारी वकिल कार्यालयबाट आइतबार हत्कडीसहित फरार भएकी अभियुक्त मिना शाही दमाई सोमबार बिहान भारतको पलियाबाट पक्राउ परेकी छन्। टीकापुर नगरपालिका–१ गणेशपुर शिविरमा बस्दै आएकी ५० वर्षीया शाहीलाई मानव बेचबिखन मुद्दामा वैशाख ४ गते इलाका प्रहरी कार्यालय टीकापुरले पक्राउ गरेको थियो।

म्याद थपका लागि सरकारी वकिल कार्यालय लगिएको बेला उनी फरार भएकी थिइन्। जिल्ला प्रहरी कार्यालय कैलालीका अनुसार उनलाई भारतबाट पक्राउ गरी धनगढी ल्याइँदैछ। घटना क्रममा लापरवाही भएको भन्दै प्रहरी सहायक हवल्दार चक्र अधिकारी र प्रहरी जवान लोकराज जोशीलाई निलम्बन गरिएको छ। मिनामाथि आफन्त नाता पर्ने बालिकालाई भारतमा बेचबिखन गरेको आरोप छ।