शिक्षा ऐन माग गर्दै शिक्षक महासंघको अनिश्चितकालीन आन्दोलन सुरु

काठमाडौं । शिक्षा ऐन जारीको माग गर्दै नेपाल शिक्षक महासंघले सोमबारदेखि देशभर अनिश्चितकालीन शैक्षिक हडतालको घोषणा गरेको छ। महासंघका अध्यक्ष लक्ष्मीकिशोर सुवेदीले सबै विद्यालय बन्द गरी शिक्षक तथा विद्यालय कर्मचारीलाई काठमाडौँको सडक आन्दोलनमा अनिवार्यरूपमा सहभागी हुन आग्रह गरेका छन्।

महासंघले आइतबार एक विज्ञप्ति जारी गर्दै आन्दोलनको अवधिमा उत्तरपुस्तिका परीक्षण, नतिजा प्रकाशन, तालिम, सेमिनार, शैक्षिक भ्रमण लगायतका कुनै पनि क्रियाकलापमा सहभागी नहुन शिक्षकहरूलाई आग्रह गरेको छ।
विज्ञप्तिमा भनिएको छ, ‘यो आन्दोलनप्रति ऐक्यवद्धता प्रकट गरी दिनु हुन विद्यार्थी, अभिभावक, विद्यालय व्यवस्थापन समिति लगायत सबै शैक्षिक सरोकारवालाहरुलाई हार्दिक अनुरोध गर्दछौं।’

नेपाल शिक्षक महासंघ माघ २० गतेदेखि चरणबद्ध आन्दोलनमा रहेको छ। सरकारले वार्ताका लागि पहल गरे पनि महासंघले औपचारिक संवादमा जान अस्वीकार गर्दै सडक आन्दोलनलाई निरन्तरता दिएको हो।
काठमाडौँ केन्द्रित आन्दोलनका कारण विद्यालयहरूको पठनपाठन अवरुद्ध हुनुका साथै एसईईको उत्तरपुस्तिका परीक्षण कार्यसमेत प्रभावित भएको छ। शिक्षा मन्त्रालयले शिक्षक महासंघलाई संवादका लागि अपिल गर्दै आएको भए पनि महासंघले त्यसलाई अस्वीकार गर्दै आएको छ।