राजसंस्था, दल र जनताको साझा बिन्दु खोज्नुपर्ने चन्दको धारणा

काठमाडौं – पूर्वप्रधानमन्त्री लोकेन्द्र बहादुर चन्दले मुलुकको राजनीतिक अस्थिरता, जनआक्रोश तथा राज्यसंयन्त्रप्रति घट्दो जनविश्वासप्रति गम्भीर चिन्ता व्यक्त गर्दै सबै पक्षलाई मिलन बिन्दु खोज्नुपर्ने आवश्यकता औंल्याएका छन्। सोमबार साँझ जारी प्रेस वक्तव्यमार्फत् उनले राजसंस्था, राजनीतिक दल तथा जनतालाई एउटै साझा बिन्दुमा ल्याउनु जरुरी रहेको बताएका छन्।

उनले सरकार, संसद, न्यायपालिका तथा राज्यका अन्य निकायहरूमा जनविश्वास कमजोर बन्दै गएको उल्लेख गर्दै आम जनतामा निराशा र आक्रोश बढ्दै गएको बताएका छन्। उनका अनुसार, दशक लामो माओवादी द्वन्द्व तथा ०६२/०६३ को आन्दोलनपछि मुलुक राजनीतिक अस्थिरता, भ्रष्टाचार र कानूनी व्यवस्थाको कमजोरीले उत्तरदायित्वहीनताको भूमरीमा फस्दै गएको छ।

चन्दले निषेधको राजनीतिबाट मुलुक अघि बढ्न नसक्ने धारणा राख्दै राष्ट्रिय सहमति, सहकार्य तथा सबै पक्षबीचको राष्ट्रिय एकतालाई अबको अपरिहार्य मार्गका रूपमा चित्रण गरेका छन्। उनले आ-आफ्ना आग्रह, पूर्वाग्रह र अहम त्याग गर्दै मुलुकलाई निकास दिन साझा बिन्दु पहिल्याउनुपर्ने सुझाव दिएका छन्।

यसैबीच, चैत १५ मा काठमाडौंमा राजसंस्था पुनर्स्थापनाका लागि आयोजित शान्तिपूर्ण विरोधसभामा भएको घटनाबाट आफू मर्माहत भएको उल्लेख गर्दै उनले हिंसा, आगजनी तथा लुटपाटका घटनाहरूको निष्पक्ष छानबिन गर्न उच्च स्तरीय न्यायिक आयोग गठनको माग गरेका छन्। साथै, आन्दोलनका क्रममा ज्यान गुमाउनेहरूप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेका छन्।

पूर्वप्रधानमन्त्री चन्दले नजरबन्दमा रहेका तथा हिरासतमा रहेका नेताहरूको विनाशर्त रिहाइको माग गर्दै राजसंस्था पुनर्स्थापनाका लागि संयुक्त जनआन्दोलन समन्वय समितिका संयोजक नवराज सुवेदी, राप्रपाका वरिष्ठ उपाध्यक्ष रविन्द्र मिश्र, महामन्त्री धवलशमशेर राणा लगायतका नेताहरूलाई तत्काल रिहा गर्न आग्रह गरेका छन्।

देशको पछिल्लो राजनीतिक अवस्थाले नयाँ मोड लिँदै गर्दा चन्दको यो वक्तव्यले राजनीतिक वृत्तमा व्यापक बहस सिर्जना गर्न सक्ने विश्लेषकहरूको धारणा छ।