राष्ट्रियसभाबाट पाँच प्रतिस्थापन विधेयक बहुमतले पारित

काठमाडौं । राष्ट्रियसभाले पाँचवटा प्रतिस्थापन विधेयक बहुमतले पारित गरेको छ। आइतबार सम्पन्न बैठकमा राष्ट्रियसभाका अध्यक्ष नारायणप्रसाद दाहालले विधेयकहरू बहुमतले पारित भएको जानकारी गराएका हुन्।

पारित विधेयकहरूमा ‘सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक, २०८१’, ‘सहकारीसम्बन्धी केही नेपाल ऐनलाई संशोधन गर्ने विधेयक, २०८१’, ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’, ‘निजीकरण (पहिलो संशोधन) विधेयक, २०८१’ तथा ‘आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने विधेयक, २०८१’ रहेका छन्।

विधेयकहरूलाई राष्ट्रियसभामा संशोधनसहित दफावार छलफलपछि पारित गरिएको हो। अब यी विधेयकहरू प्रतिनिधिसभामा सन्देशसहित पठाइनेछ।

यसैबीच, राष्ट्रियसभाको अर्को बैठक आगामी चैत २५ गते सोमबार दिउँसो १:१५ बजे बस्ने तय भएको छ।