एभिन्यूज टेलिभिजनले पत्रकार सुरेश रजकका परिवारलाई राहत, स्मृति सम्मान तथा कोष स्थापना

काठमाडौं । एभिन्यूज खबरका पत्रकार सुरेश रजकको २०८१ चैत १५ गते काठमाडौँको तीनकुनेमा राजावादी प्रदर्शनका क्रममा हत्या भएको घटनाप्रति एभिन्यूज खबरले गहिरो दुःख व्यक्त गरेको छ। घटनाको निष्पक्ष र उच्चस्तरीय छानबिन गरी दोषीलाई कानूनी कारबाही गर्न, मृतक रजकलाई शहीद घोषणा गर्न तथा उनका परिवारलाई राहत उपलब्ध गराउन सरकारसमक्ष पहिले नै माग गरिएको छ। यसैक्रममा, एभिन्यूज खबरले स्व. रजकको सम्झनामा ‘सुरेश रजक स्मृति कोष’ स्थापना गर्ने निर्णय गरेको छ। सो कोषका लागि रु. १०,००,००१ (दश लाख एक रुपैयाँ) विनियोजन गरिनेछ, जसको व्यवस्थापन सुरेश रजककी श्रीमती र एभिन्यूज खबरका प्रतिनिधिले गर्नेछन्। साथै, इच्छुक दाताहरूलाई कोषमा योगदान गर्न आह्वान गरिनेछ।

यसैगरी, हरेक वर्ष चैत १५ गते स्व. रजकको पुण्यतिथिमा उत्कृष्ट टेलिभिजन पत्रकारलाई ‘सुरेश रजक स्मृति टेलिभिजन पत्रकारिता सम्मान’ प्रदान गरिनेछ। साथै, एभिन्यूज खबरले स्व. रजकका परिवारका सदस्यहरूलाई रोजगारीको अवसर दिलाउन पहल गर्नेछ। मृतकका परिवारलाई काजक्रियाका लागि रु. १,००,००० (एक लाख) प्रदान गरिसकिएको छ भने रु. १० लाख बीमा रकम प्राप्त गर्न आवश्यक प्रक्रिया अघि बढाइएको छ। साथै, स्व. रजकले संस्थाबाट पाउनुपर्ने सम्पूर्ण आर्थिक भुक्तानी परिवारलाई प्रदान गरिसकिएको जानकारी गराइन्छ।

पत्रकार सुरेश रजकको निधनले नेपाली सञ्चार जगतमा अपूरणीय क्षति पुर्याएको छ। उनको स्मृतिमा स्थापित कोष तथा सम्मानले पत्रकारिता क्षेत्रमा योगदान दिन प्रेरणा प्रदान गर्ने विश्वास एभिन्यूज खबरले लिएको छ। अन्य आवश्यक निर्णयहरू एभिन्यूज खबर व्यवस्थापनले समयानुकूल गर्नेछ।