भक्तपुरको बिस्का जात्रा सभ्य, भव्य र शान्तिपूर्ण सञ्चालन गर्न सरोकारवालासँग समन्वय बैठक सम्पन्न

भक्तपुर, २०८१ चैत १४ – भक्तपुर नगरपालिकाले नजिकिँदै गरेको प्रसिद्ध बिस्का जात्रालाई व्यवस्थित, सुरक्षित र भव्य रूपमा सम्पन्न गर्न सरोकारवालाहरूको बैठक सम्पन्न गरेको छ। भक्तपुर नगरपालिकाका प्रमुख सुनिल प्रजापतिको अध्यक्षतामा सम्पन्न उक्त बैठकमा जात्राको तयारी, सुरक्षा व्यवस्था तथा व्यवस्थापनका विविध पक्षबारे छलफल गरिएको छ।

बैठकमा प्रमुख प्रजापतिले २०८१ चैत २८ देखि २०८२ वैशाख ५ गतेसम्म सञ्चालन हुने बिस्का जात्रालाई सुरक्षित र व्यवस्थित रूपमा सम्पन्न गर्न सबै सम्बन्धित निकायले आफ्नो भूमिकामा क्रियाशील हुनुपर्ने बताउँदै जात्रालाई अन्तर्राष्ट्रिय स्तरमै आकर्षणको केन्द्र बनाउन आवश्यक सहकार्य आवश्यक रहेको उल्लेख गरे। उपप्रमुख रजनी जोशीले पनि गत वर्षझैँ यस वर्ष पनि जात्रालाई सफलतापूर्वक सम्पन्न गर्न सरोकारवालाहरूको पूर्ण सहयोग रहने विश्वास व्यक्त गरिन्।

जिल्ला प्रशासन कार्यालय भक्तपुरका प्रमुख जिल्ला अधिकारी गोपालप्रसाद अर्यालले नगरपालिकाले अपनत्व लिई जात्राको व्यवस्थापनमा देखाएको सक्रियता प्रशंसनीय रहेको बताए। उनले जात्रालाई देशकै सांस्कृतिक पहिचानका रूपमा शान्तिपूर्ण रूपमा सम्पन्न गर्न सबै पक्षले जिम्मेवारीपूर्वक भूमिका निर्वाह गर्नुपर्नेमा जोड दिए।

गुठी संस्थान भक्तपुरका प्रमुख खिमा ओलीले जात्राका लागि हालसम्म गरिएका तयारीबारे जानकारी गराउँदै, जात्राका धार्मिक तथा सांस्कृतिक पक्षलाई व्यवस्थित बनाउन गुठी संस्थान प्रतिबद्ध रहेको उल्लेख गरे।

भक्तपुर ट्राफिक प्रमुख एवं ट्राफिक प्रहरी निरीक्षक प्रदीप खत्रीले कार्यक्रममा ट्राफिक व्यवस्थापन सम्बन्धी आफ्नो धारणा प्रस्तुत गरे।  बैठकमा भक्तपुर नगरपालिकाका जनप्रतिनिधि, सुरक्षा निकाय, नेपाल टेलिकम, नेपाल विद्युत् प्राधिकरण, खानेपानी कार्यालय, नेपाल रेडक्रस सोसाइटी, विभिन्न जात्रा व्यवस्थापन समितिका प्रतिनिधिहरूको उपस्थिति रहेको थियो।

बैठकले जात्राको सफल सञ्चालनका लागि निम्न निर्णयहरू गरेको छ:

१. नगर व्यवस्थापन – भक्तपुर नगरपालिकाले जात्रास्थलहरूको सरसफाइ, आवश्यक व्यवस्थापन तथा प्रचारप्रसारको जिम्मेवारी लिने।
२. शान्ति सुरक्षा – जिल्ला प्रशासन कार्यालय, प्रहरी प्रशासन तथा सुरक्षा निकायहरूले समन्वयात्मक रूपमा शान्ति सुरक्षाको व्यवस्था मिलाउने।
३. पूजाआजा व्यवस्थापन – गुठी संस्थान भक्तपुरले पूजाआजा तथा जात्रा समयमै सम्पन्न गर्न आवश्यक तयारी गर्ने।
४. संलग्न समुदायको भूमिका – भैल नायो, भद्रकाली अजिमा गुठियार, जात्रा व्यवस्थापन समिति र सम्बन्धित वडा कार्यालयले पूजाआजा तथा व्यवस्थापनको जिम्मेवारी लिने।
५. इन्फ्रास्ट्रक्चर व्यवस्थापन – जात्रास्थलमा रहेका अव्यवस्थित तार, केबुल तथा फाइबर नेटलाई सम्बन्धित सेवा प्रदायकहरूले व्यवस्थापन गर्ने, नगरपालिकाले सहजीकरण गर्ने।
6. स्वास्थ्य तथा विपद् व्यवस्थापन – नेपाल रेडक्रस सोसाइटी भक्तपुरले आपत्कालीन एम्बुलेन्स, दमकल तथा विपद् व्यवस्थापन सामग्री तयारी अवस्थामा राख्ने, अस्पतालहरूलाई आपत्कालीन वार्डमा स्वास्थ्यकर्मी सतर्क अवस्थामा राख्न समन्वय गर्ने।
7. भीड व्यवस्थापन – २०८१ चैत ३१, २०८२ वैशाख १ र ५ गते भीड नियन्त्रणका लागि स्वयंसेवक परिचालन गर्ने।
8. यातायात व्यवस्थापन – भक्तपुर ट्राफिक कार्यालयले जात्राका क्रममा सवारी व्यवस्थापनको जिम्मा लिने।
9. खानेपानी तथा विद्युत् व्यवस्था – केयूकेएलले निरन्तर खानेपानी आपूर्ति गर्ने, नेपाल विद्युत् प्राधिकरणले अवरोधरहित विद्युत् सेवा उपलब्ध गराउने।

बैठकका निर्णयहरू कार्यान्वयन गर्न सम्बन्धित सबै पक्षहरू समन्वयमा जुट्ने प्रतिबद्धता जनाइएको छ।