दलितको घरमा डोजर चलाउने गाउँपालिका अध्यक्ष र पूर्ववडाध्यक्ष पक्राउ

काठमाडौँ , ९ चैत । औरही गाउँपालिका–५ मा महायज्ञका नाममा दलित दीपक मलिकको घर डोजर चलाएर भत्काउने र उठीबास लगाउने गाउँपालिका अध्यक्ष शिवजी यादव र पूर्ववडाध्यक्ष दिलीप यादव पक्राउ परेका छन्। बिहीबार घटनाबारे समाचार सार्वजनिक भएपछि अध्यक्ष यादव जिल्ला प्रशासन कार्यालय पुगेका थिए, जहाँ दुवैलाई नियन्त्रणमा लिइएको छ। अछूत भन्दै मलिकको घर भत्काउन लगाउने आयोजक बजरंगी बाबा भने पक्राउ परेका छैनन्।

चैत १७ गतेदेखि महायज्ञ लगाउन औरही–५ का दलित दीपक मलिक (डोम) को घर फागुन १० गते भत्काइएको थियो। गाउँपालिकाको जेसीबी लिएर अध्यक्ष यादव आफैँ घर भत्काउन गएका थिए। घर भत्काएर त्यसको माटोसमेत ताछेर फालेपछि जातीय विभेदको आरोप लागेको थियो। यस घटनामा तीव्र विरोध भएको छ। घटनाबारे समाचार सार्वजनिक भएपछि चौतर्फी आलोचना भएसँगै प्रहरीले दुवैलाई नियन्त्रणमा लिएको हो।

पीडित परिवारले डरका कारण उजुरी दिन सकेको थिएन। विभिन्न संघसंस्थाले घटना प्रकट भएपछि दोषीमाथि कारबाहीको माग गरेका छन्।